المساعد الشخصي الرقمي

مشاهدة النسخة كاملة : تحقيق



إسكندرانى
15-06-2004, 03:46 AM
(رد على الحملة الأسبوعية الشرسة على الفنان /عادل إمام فى جريدة صوت الأمة القاهرية)
تحقيق

إنه ف اليوم والتاريخ
والوقت المشار إليه ف أعلاه
تم إحضار المتهم إياه
معصوب العينين
مربوط الإيدين
ولكشف الحقيقه
من أول دقيقه
تمت مناظرة
كل الجروح اللى ف خدوده.....
وكل الخدوش اللى ف قفاه
وتم التأكد إن المدان
هوّ اللى عور
وشه وقفاه

وبان للنيابه
إن العيال
بتوع المباحث
حبة غلابه.....
وماهومش ديابه
زى اللى قال

وف نفس المكان
اللى حددناه
قمنا بصفتنا
صاحب السياده
والسلطه والجاه
البيه الموقع عليه ف أدناه
محمد الباز
عين المباحث
عند الصحافه....
وأول رئيس لعموم النيابه
الخاصه بأمور وشئون الجواز
بالبدء معاه فى الإستجواب
والتحقيق والتدقيق
بدون حضور
محامى عنه
يحامى عنه
أو رسول من النقابه
أو صديق

• إسمك أيه؟
▫ عادل إمام
• سنك كام؟
▫ قول خمسين, قول ستين
مابتفرقش
حتى ان كانوا يدوب سنتين
لكن عمرى الفنى بقاله
سنين وسنين
• خليك دوغرى....
وإوعى تلف كتير وتدور
قول وبسرعه
ساكن فين؟
والمهنه بتاعتك ف الباسبور

▫ فنان مصرى
عايش كل مشاكل عصرى
عاشق بلدى....
وساكن فيها....
وحاسس بيها
ف انتصاراتها
وانكساراتها
واتربيت ف نهارها وليلها....
وشايل ليها ف قلبى جميلها
عشان بالبلدى
راضع منها مية نيلها....
ومهما سافرت
بعيد أو غبت
برجع ليهاعشان بلاقيها
هىّ كمان ساكنه ف قلبى
• بس كفايه قلبت دماغى
كمل يلا وقوللى الباقى
بسرعه قوام
دينك أيه؟

▫ الإسلام
• بتقول إسلام؟
الله الله
يعنى كمان
متورط جداً ف الإرهاب
إنطق قول
تعرف مين؟
وبتاخد منه
كل أوامرك
إنطق قول
لأقصف عمرك
إنطق قول
وبتقبض كام؟
ساكت ليه؟
إنطق قول
الإسم الحركى
بتاعك أيه
▫ والله حرام
بقى ده اسمه كلام؟
يتهان الفن والفنان
ألف خساره عليك يازمان

أنا مش قاتل أو إرهابى.....
وعمرى ماكنت ف لحظه حرامى....
ونفسى بجد ف حد يقوللى
دليل إجرامى

قوللى جنابك
فسر لىّ
كل كلامك
أيه الغلطه اللى انت لامسها...
وأيه التهمه اللى انا ح البسها....
وأيه القصه والعنوان؟

• إنت ازاى وبكل جساره
ترضى تجوِّز بنتك ساره
لواحد ابوه كان م الإخوان؟
أما صحيح مانتش فنان

▫ هوّ جواز البنت جريمه
ولاّ ف شرع السلطه الرابعه
أصبح جنحه وقلة قيمه؟

• إكتب عندك
ضيف ف الدفتر
إن البيه مش عاجبه المنظر
وبيتمسخر وبيتمنظر
وقبل ما تكتب قفل المحضر
سيبه يهاتى
واكتب عندك نص الآتى :

• يُشطب إسمه
من ارشيف الفن عشان
الناس ترتاح
• تُفضح عيلته....
• وتُشتم بنته ف كل مكان ف الجرنان
• وف كل صباح
تُنهش سيرته أمام الأمه....
• وتُنشر صورته ف صوت الأمه
زى العاده
ماساك كاس الويسكى ف إيده...
ولابس عِمه....
وقاعد يشرب ع السجاده.....
ويقرا الورد والقرآن

▫ كلمه أخيره لأهلى وناسى
رغم الحزن الساكن قلبى....
ورغم مرارة الجرح القاسى
أنا مش ناسى.....
وعمرى ما ح انسى ان انا فنان
بس كمان
أنا إنسان
من حقه يحقق أمنياته
من حقه يحاول
تحقيق ذاته
من حقه وأبسط كل حقوقه
إنه يعيش ويموت فى أمان
إسكندرانى
15/6/2004