المساعد الشخصي الرقمي

مشاهدة النسخة كاملة : معاهدة صلح بكتبها يا ست الكل



د.جمال مرسي
22-10-2005, 10:25 PM
معاهدة صلح

د. جمال مرسي

جميلة هي المشاكسات التي تحدث غالبا بين الرجل و المرأة
و التي تنتهي دائما بأن الرجل المسكين المغلوب على أمره يقدم تنازلاته و يعرض عليها معاهدة الصلح .
كنا في المنازلات الشعرية نبدأ بتلك المشاكسات بين الرجل و المرأة
أما هنا فسأبدأ أنا من النهاية .. من معاهدة الصلح
و ربنا يجعل كلامنا خفيف عليكن يا معشر نساء الواحة

معاهدة صلح بكتبها

بعطر الفل

و باقةْ ورد اقدمها لست الكل

و أقول خاطرك على راسي

و اسجل لك ف. كراسي

و عمري ف. يوم ما شيل منكْ

مهو انتِ نبض احساسي

مهو انت الأم

و انت الأخت

و انت الزوجة و المرسى

على شطك مراكبي بالهنا ترسى

و شايلالك هداياها

كلام ساكن حناياها

و بتقولك

يا ريت ترضي يا ست الكل

***

أنا الراجل ..

و إنتي نبضتي الغاليه

و انتي ضحكتي العاليه

و رب الكون خلق آدم ، خلق حوا

و مين هيعمّر الدنيا

سوى آدم ، و غير حوا

***

صحيح يمكن مشاكلنا

تغيظنا أو تبهدلنا

و لكن لما نتصافى

بنضحك من دواخلنا

و نملا البيت ولاد و بنات

بيتخانقوا على قشره

بحكم الجنس و الفطره

و لكن يرجعوا تاني

و يتقابلوا على السفره

و من تحت الترابيزه

تلاقي النغز بالرجلين

و من فوق الترابيزه

تشوفهم أجمل الحلوين

محدش كان لديه فكره

***

و نفس الحال كبار و صغار

و زي ما فيه رجل عاطل

تلاقي نساء من الأشرار

و مش لازم بقى نعمم

و نتكلم

هيفضل شكل قصتنا

كمثل القط ..

بيناغش حبيبه الفار

***

يا ست الكل يا أمي

و من غيرك

ما كنت كبرت و اتربيت

و انا شايف حنانك مالي كل البيت

يا ست الكل يا بنتي

يا دكتوره

و أموره

و رافعه في السما هامتي

يا ست الكل يا مراتي

أنا ما خنت يوم عهدي

و دايماً راحْ أصون ودي

و لكن حكمة الخالق

و هوَ الحاكم العادل

بإنك تبقي إنتي الست

و انا افضل أنا الراجل

و لو مرت سنين وسنين

هتفضل نفس أوضاعنا ليوم الدين

زاهية
22-10-2005, 10:57 PM
خلاص سامحيه ياست الكل

ده حبّو ليكي زي الفل

عشان رامي خلاص سامحيه
:001:
عشان مروة

عشان سلمى
:001:
عشان أيامكم الحلوة

عشان العدَّى واللي جاي

هتبقي في عيونو الضي

إنت القمر في ظلمتو

إنت الشمس في طلعتو

إنت الدفا

إنت الصفا

إنتِ المحبه والوفا

إنتِ الحنان

إنتِ الأمان

في البيت وف كلِّ مكان

خلاص سامحيه

وادعي لربنا يهديه

مادام قلبه مافيش غيرك هتسكن فيه


أختكم
:0014:
بنت البحر

د.جمال مرسي
22-10-2005, 11:00 PM
هههههههههههههههههههههه
ماشي يا زاهية
راجع بكره تاني
تصبحين على خير الآن

زاهية
22-10-2005, 11:33 PM
وأنت من أهلهم

سلام لست الكل

عبلة محمد زقزوق
22-10-2005, 11:49 PM
أستاذي د / جمال مرسي


يدوم الود والوداد ... بين المحبين

ويدوم ما بينهم ... من صفا وحنين

يدوم ... ويدوم

بباقة فل ... وريا حيين




ودام ما بينكم ، وبين أحبائكم ... كل الحب والوئام

سحر الليالي
23-10-2005, 01:04 AM
الله عليك يا أم رامي
كل هالكلام ولسه زعلانه؟؟
فالله در من زوج مخلص ؟؟
أدام الله بينكم المحبة ولا فرقكما أبدا
وشكرا لك يا أبا رامي لهذه الكلمات الجميلة
لك خالص احترامي وتقديري المحمل بالورد