حبيبي يا رسول الله .. دافعوا عن نبيكم و لو بكلمة
أحبائي شعراء العامية الكرام في الواحة
من منا لم تحركه الحملة الشعواء التي شنتها الصحافة الدنماركية و تبعتها صحف غربية أخرى كثيرة
على نبينا الكريم صلى الله عليه و سلم ؟ من منا لم يشتاط غضباً و غيظاً لفعلتهم النكراء ؟
ألهمني الله هذه الكلمات دفاعا عن النبي الكريم و تمنيت أن تشاركوني
هذا الإحساس فأرى نبض قصائدكم العامية هنا .
حبيبي يا رسول الله
شعر د. جمال مرسي
حبيبي يا رسول الله .
يا خاتم أنبياء الله .
يا مُرسَل بالهدايه من إله الناسْ ..
لكل الناسْ .
و بالقرآن تنور ضلمة التايهين
و ترجم بيه شيطان خناسْ .
و في سالف عصور الجهلْ ،
كنت النورْ .
و ينزل بالهدى جبريلْ ،
يقول : " اقرأ " ..
يزيد النورْ
و ييجي الأمر من ربكْ ،
تهاجر يا بن عبد اللهْ
تخط برجلك الطاهره طريق النورْ .
و نفضل في سنا نوركْ ...
على درب الهدي ماشيين ،
ليوم الدين .
عشان حققت للدنيا بكلْمة حق مطلبها
و خليت الطريق واضحْ
في شرقيها و مغربها
و جند الشر بالحجة بتغلبها
و تجذبها،
لدين اللهْ .
و لو كنت الغليظ القلب كانوا انفضّوا من حولك
و لكنكْ ..
مثال النُبل و الأخلاق في كل زمانْ
و جيت بالحق لجل تتمم الأديان
و تغرس في القلوب الطهر ،
تمحي الغدر و الطغيانْ .
و يتبدل سلاح الكفر و الجبروت
بغصن أمانْ .
و من نار الجحيم نهربْ إلى جنه من الإيمان
لأنّك رحمة للإنسان .
***
و بيدور الزمن بينا ...
و لا نصحصح
و تتبدل رجال و بلاد
تروح أمجاد
و ييجي ناس كتير حُسّاد
قلوبهم صخره مليانه بزيف و سواد
لا لاقوا حد يردعهم
و لا بالحق يمنعهم
فسابوا كلابهم الهايجه بعرض "المصطفى" تسرح
و تكذب تفتري تنبح
و تنشر سمها تجرح
و في الدنمارك يا حسرهْ...
لقت مطرح
و قلبي للأسى و الحزن يا "طه" بقى مسرح .
صور عِفْنه و كدابه
جرايد كلها كتابه
تعالب مكر و ديابه
و مين يا ناس يصحّينا من النومه ؟
ندافع عن حبيب الله بكلمة حق أو قومه
نشوف أعداءْ لنا بانوا و لا مرايه
إذا قابلونا وش لوش و حكايه
و لما نديّر السحنهْ ...
لهم في الضهر سلاّيه .
بتنهش لحمنا و تدبح
***
حبيبي يا رسول الله
فداك روحي
فداك أهلي و أولادي
راح ارفع بالندا صوتي
و أقول الحق لو في الحق كان موتي
بضايعهم نقاطعها
و شكوانا ، لمجلس أمن نرفعها
نخلي الأرض ، كل الأرض تسمعها
و لولا إن دين الحق علمنا
بإن الأنبيا واحد
لكنا نقول على موسى
على عيسى
و لكن ربنا الواحد
أمرنا بالإيمان بيهم
و دا الفرق اللي بين الكفر و الإيمان .
و دا العلم اللي علمته
لنا في خاتم الأديان .
و صلى الله على محمد و على آله و صحبه و سلم
رد مع اقتباس
المشاركة الأصلية كتبت بواسطة بحرالشوق
