قصيدة .. [ لأ يا عبيط ] شعر نبيل مصيلحي

لأ يا عبيط
**


وماتحلمش
تعيش في الدنيا
عبيط
يا عبيط
تبقى اخترت تعيش
في عيون الفقر الإسود
فارس
فوق ضهرك
خيبتك فى غبيط
يا عبيط
إفرض مثلاً
إنك تقدر تعمل
زي ما قال الشاعر :
" لو معرفتش تضحك
على حد ..
اضحك على نفسك .."
يا عبيط
أبسط شيء
هيقول الناس
انك مجنون
وما ينفعش لعقلك
حاجه
من تربيط
أو تظبيط
يا عبيط
إفرض مثلاً
إنك تقدر تعمل
زي ما قال الشاعر :
" حط صوابعك جوه الجزمه
ودوس
واقعد واتنِّك ع الكورنيش
وف وش الأبعد
حط الجزمه
ع الرقعه اللى ف ركبة
جينزك
وداريها
وأي سيجاره قديمه
ع الأرض
امسكها
وولعها كويس
واعمل بيه .. "
يا عبيط
ماتفكرش في يوم
تتظاهر
أو تتعنطظ
من غير داعي
وانت الواعي لنفسك
إنك
مش راح تقدر أبداً
تبقى في وسط الغش
حويط
يا عبيط
إفرض مثلاً
إنك تقدر تعمل
زي ما قال الشاعر :
" روح على أجمل
بنت تقابلك
واقعد قدامها
واعمل إنك قرفان
واتقل
ومتقولك ساعتك كام
متبصش على ايدك
بص عليها بدهشه
كأن محدش
كان قدامك
وانك متفاجىء بيها
وشويه وقوم .. "
يا عبيط
لا انت معاك عربية بابا
المتداري صالونها
بقزاز إسود
ولا حتى معلَّق في رقبتك
جنزير
من دهب الـ ماما
ولا شكلك يوحي
بأنك
من جنس الهاي
يبقى بكل بساطه
هتفتح
جيب شنطتها الجلد
الأصلى
وهتديك الحسنه
وتمشى .....
سيباك
يا عبيط
إفرض مثلاً
إنك تقدر تعمل
زي ما قال الشاعر:
" شاور للتاكسى بكل
قلاطه
لمَّا يقفلك
قول رايح بيروت
هيسيبك طبعاً .. "
يا عبيط
هيسيبك إيه
مليون في الـ 100
هينزل
يخدك كام شلوط
وهيشبع
في قفاك تخبيط
يا عبيط
يمكن تتهف في عقلك
وتصدق
زي ما قال الشاعر:
"مش هيقولوا عليك
دا فقير
الناس قدامها الظاهر
عارف
أصلك ميت ميت
واما تموت بقلاطه
أحسن مليون مره
من موتك كده .. "
يا عبيط
الناس درجات
حاول تطلع
وحده بوحده
وان ماقدرتش
حاول تاني
وماتخرجش فى يوم
من جلدك
يبقى احسن لك
لمَّا تموت
الناس هيقولوا
عاش من كَّده
مات على أده
ولاَّ
يتفوا عليك
ويقولوا
مُت قليط
وعشت عبيط
يا عبيط
**

الله ياعم نبيل !!
عرفت كيف تضحكنا وتبكينا
فنان بجد

جميلة حقيقة يا أستاذ نبيل
سلمت ودام إبداعك

سؤال:
هل اقوال الشاعر التى بين الأقواس قصيدة لحد تاني ؟!!

حقيقي بأسأل مش باتغابي لأني حسيت كده!

فعلاً أضحكتنى ولديك القدرة على أن تجبر القارئ على مواصلة القراءة

ليصل لنوعية وأصل ذلك العبيط

تحيتى لك أستاذ نبيل

فعلاً حلوة

الصديق الأديب الرائع / مجدي جعفر
خالص تحياتي
بين اللحظة والأخري أنتظرك ..
أصبحت مشغول يا عم " مجدي " .. الله يكون في عونك
ولكن لا تبخل على المنتدي بانطباعاتك الثرية
خالص ودي
نبيل مصيلحي

الصديق الدكتور / إكرامي قورة

شكراً على نبل أخلاقك واهتمامك بالمتابعة وإبداء الرأي ..
بالنسبة للرد على سؤالك ..
فالقصيدة من ديواني الثالث والذي صدر مؤخراً بعنوان " حكايات تخلِّي الواحد يموت م الغيظ " .. وبالفعل الشعر بين علامات التنصيص للشاعر/ عزت إبراهيم
وعندما أتعامل مع التضمين لأحد الشعراء أراعي الأمانة في النقل وتدوين الشعر كما كتبه الشاعر ..
شكراً لك على تواصلك ..
نبيل مصيلحي

المبدعة / منى محمود حسان
تحياتي

القصيدة من نوع الشعر الساخر الناقد لإسلوب شريحة من المجتمع
أو بمعنى أدق هذا الشاب الذي يخرج عن جلده ويرتكب سلبياته تطيح
بآدميته .....................
شكراً لمرورك اطيب وانطباعك الواعي
خالص تحياتي
نبيل مصيلحي

كويس ان د. اكرامى سئل

انا قلت لنفسى ياعبيط
كل كلام بين التنصيص
يبقى لنفس الشاعر
صدق
صدقت وخفت جريت

ولما رجعت
قريت ياعبيط
خفت رجعت
ودمت بخير

تحياتى لما ابدعت

كل المحبه .. لــ حرفكـ الباذخ
كل أمل أن ياتى نهار ..

يسلمووو نبيل على القصيده النازفه ..
لك الود

المبدع الجميل د. / فوزي أبو دنيا
خالص مودتي

انتظرتك .. وها أنت هنا بروحك الشاعرة ..
دمت طيب الأخلاق
نبيل مصيلحي