ثلاثيات ورباعيات سامح الشبة

( 58 )

البنت دى أحلى بنت أنا شفتها
فى رسمها ووصفها واسمها
البنت دى مش أى بنت عرفتها
البنت دى جوه القلب نبضها
*****

( 59 )

مين اللى دبح الديك وكال الفرخة
مين اللى دمع عنينا وموت الفرحة
مين اللى دبح ف القلوب وخِتم بالقرحة
مين اللى دمع عنيه مليانة بالفرحة
*****

( 60 )

مليت فرجة على بعضنا البعض
وزهقت من قاعدتنا جنب بعض
لازقين لزقة ماشفتهاش على حد
كأننا هانموت وبنموت لو سبنا بعض
*****

( 61 )

قلت الفرج جه خلاص
وانحلت الأزمة وجه الخلاص
انقتل أخويا كفايه خلاص
قالوا لى لسه معانا رصاص
*****

( 62 )

خمسين طعنة شقت القلب وشرحته تشريح
واندفن جواه الحزن من غير إذن ولا تصريح
وانكفت دمعة م النِن نشفت دم الحلم الدبيح
وانفرط م الحلق كلامه لا همس ولا تلميح
*****

( 63 )

مابقتش أصدق حد
لا بهزار ولا بجد
دا كل يوم على ضهرى
مليون جبل بيتهد
*****

( 64 )

فراق ووصال ... خصام وصلح
جنة ونار ... سكر وملح
وأنا وحبيبتى فى الدنيا عايشين
بنفس واصل ما بين سهم ورمح
*****

( 65 )

كل دى أحلام
أحلى م الأحلام
سهلة جداً تحقيقها
بس لما أنام
*****

( 66 )

هموم وباشيلها وبركنها على جنب
لأن فاعلها أحياناً مالوش ذنب
وليه ألوم غيرك يا قلبى
وأنت اللى دايماً مليان بالهموم والغلب
*****

الشاعر الجميل سامح الشبة تحياتى لك ومودتى