ثلاثيات ورباعيات سامح الشبة

اسمح لى ان اشاركك بهذه الرباعية

ساعات اغنى للفرح يطرح غنايا انين
ساعات انادى ع الغنا يطلع غنايا ضنين
شاعر بحزنى وبغنى حزنى بربابة
بس مش كل الحزانا دايما يغنو حزين

( 84 )

رحتى يا فرخة يا حبيبتى وموتى
وراحت ف البيت كمان هيبتى
راحت فين البيضة اللى تسد كام بق
ولا صابتك الدوخة قبل ما تصيبنى
*****

( 85 )

عايز تسمع مِنى كلام متزوق
ابعد عن الهم وانساه وروق
دا كتر الغم ع القلب بيهده
وكتر الإنبساط والضحك بيفوق
*****

( 86 )

حالة من الحوار
بلسان وودان حمار
سايدة هنا ما بينا
وبإيد غيرنا القرار
*****

( 87 )
لفيت ف دروبها ياما لف
وياما ريقى فيها اتبل وجف
عايش بموتور محتاج يتلف
وياما وزنى فيها زاد وخف
*****

( 88 )
كلامى فى السياسة كلام غويط
تشوفه بعينك تقول بسيط
دا إنسان ساذج جنب الحيط
تحسبه بعقلك .. تهمس يا حويط
*****

( 89 )
مصر هبة النيل يا عَمر
وأنا ريقى حطبة - بل أَمر
مش لاقى ولا نقطة مايه
ما تفيدنى .. بإيد مين الأمر
*****

( 90 )
أديب وبالأدب بخط أنا حروفى
وأصب ع الصفح شجاعتى وخوفى
ولا يوم هزنى صاحب سلطان
هانحنى له واسقف له بكفوفى
*****

( 91 )
من بطن الحياة خرجت للنور
لا فوقى سقف ولا جنبى سور
بلسانى عايش ولا ماليش زور
على أرض طينة ولا أرض بور
*****

( 92 )

يا بنى يا صغير
نفسى تبقى كبير
تاه عقلى واتحير
من كتر التفكير
اكبر بقى واتغير
من طيب لأمير
*****