قلبك من يوم ما بقيت شاعر... مات
كنا هْـناك قاعدين.... كالعاده
وانا مربوك..
وعنيها مليانه بابتسامتها
وأنا عْنيه..
من سهر الأحلام على كتفي:
"عيل فوق كتف امه بيصرخ
والبنت اللي هناك عريانه
كانت عذرا
..
وازاي أفضل شاعر..
مش كان بس كفايه أكون إنسان
..
وأبوها..
تحت الأرض هناك عريان
صعبان
ف عينيّ أحس بصوته
وموته
بيدق فْ نبضات موتي
إتّ إتّ إتّ
إتّ إتّ إتّ
امتى هيرجع لابنه وبنته وبيته
هو هيرجع؟؟
يمكن عصب الأرض العاشر يتحرك..
وترجّع؟
يمكن!!
...
ليه يا دماغي..
حاسس أنك موجه وْتايهه
....
طيب وحفيده المحفور في البنت العريانه
..
البنت العريانه اللي اغتصبوها!!
وأبوها..
كمان..
عريان..
إذا...............................................
........ ...... ........"
وعنيها مليانه بابتسامتها
وانا عيني -من سهر الأفكار وسوادها-
فنجال قهوة وْ ساده
* * *
كنا هناك قاعدين
كالعاده
وانا مربوك
وعْنيها مليانه
وانا...
من سهر الـ
..
..ساده
كانت عينها بتسرح فيّه
وأنا هناك
قاعد..
***
وتنبهت وهيّ بتاخد إيدها من إيدي
..
- ياه.. ماشيه؟!
- ...
**
بصيت على ساعتي..
- ياه!! كانت واحده..
- آه.. كانت!
وحاولت اتكلم
وانحشرت أحلامي فْ حنجرتي
حسيت بالخنقه
وسرحت شويه
- زعلانه!؟
- ..
- على فكره.
- ..
-.. أنا قلبي بيموت فيكي
- بيموت؟؟؟
- أيوه بيموت فيكي
- لازم أروًّح..
الليل صعب معاك..
..
بيموت؟؟
- مش حاسة بموتي..!
طيب وحياةْ
- إوعاك تحلف..
أنا عارفه!!
قلبك من يوم ما بقيت شاعر..
مات
رد مع اقتباس
المشاركة الأصلية كتبت بواسطة د. فوزى أبو دنيا
