محتاج تاخديني فى حضنك ساعه

محتـاج
محتــــــاج
تاخديني ف حضنك ساعه
وتقولي لحضني انك عارفاه
وتلف الدنيا بحالها إشاعه
وتقول للناس انك عاشقاه
محتــــــاج
يشوفوني معاكي ف يوم
وتحطي إديكي ف حضن إديا
واما يشوفوني يشاوروا عليكي
واما يشوفوكي يشاوروا عليا
ويا ريت
تتمشي ف قلبي برحمه شويه
وتحسّي بقلبي ان قال الآه
محتـــــاج
تتوحّدي بيّا ف لحظة يأسي
واتوحد بيكي ف لحظة خوفي
تتهجي معايا الكلمه الفجر
تتحرك كل حروفي الساكنه ف جوفي
وتقول أشعار
ف عنيكي الليل
وتقول مواويل
والدنيا ترد تقول : الله !
محتـــــاج
قنديلك ليله معايا اتونّس بيه
ويحنن قلب العتمه عليا
معقول انك محتاجه إليه
عايزاه .. ؟
أنا عمري ما شفت يا خلق الله
قنديل
بيشيل قنديل ف إديه !!
ويروح
والروح تتمنى تروح وياه
محتـــــــاج
ألقاكي معايا في زمن الرِّدَّه
نبتايه بتملى الوقت البور
وتصبي عليا بطلِّ الليل اتوضَّى
وانا اصبّ عليكي عشان تتوضي بنور
وتصلي معايا الليله الفجر
وورانا تصلي بنات الحور
العِين
محتــــــاج
تشوفيني بأي عنين
بتشوف
تاخديني لبرَّه حدود الخوف
والآه
حطيني ف أي مكان ان كان
واستوطني قلبي
كمان ... وكمان
وارجوكي اتشاهدي عليّا الآن
دا الموت ف رحابك أحلى حياه
الموت ف رحابك ...
أحلى حياه !
مصطفى مقلد

لله ما أروعها من قصيدة

رائعة بكل معنى الكلمة

أهلا بك أخي المبدع مصطفى في واحة الأخيار

مرحبا بك قلما مبدعا نعتز به

تقبل خالص إعجابي وباقة ورد

وتصبي عليا بطلِّ الليل اتوضَّى
وانا اصبّ عليكي عشان تتوضي بنور
أخي الشاعر الجميل مصطفى
الإشاعة منورة !
تقبل محبتي واحترامي
شاهين

أخى شاهين
يسعدنى أن تكون أول من يرد على قصيدتى
تقبل خالص امتنانى

لله ما أروعها من قصيدة
رائعة بكل معنى الكلمة
أهلا بك أخي المبدع مصطفى في واحة الأخيار
مرحبا بك قلما مبدعا نعتز به
تقبل خالص إعجابي وباقة ورد

	الاخت المبدعة سحر الليالى من حسن طا لعى أن يستقبلنى لدى دخولى الواحة أناس من الراعين أمثالك تقبلى احترامى

اخى الحبيب مصطفى
اشكرك لسرعة تلبية الدعوة
والف مرحبا بك
ارجو ان تجد هنا ماوصفته لك حقا
هنا اخوة ومودة وثقافة
لنا هدف وعلينا التزام
هدفنا الرقى بالثقافة العربية
والتزامنا بالدين الحنيف
وانت وسط اخوة لك ارجو ان يطيب لك المقام دوما معنا
وان تشاركنا بالراى والمشورة
حبى وتقديرى