أعلان للسادة شعراء قاعة الادب الشعبى -- هام للغاية

تعلن قاعه الادب الشعبى عن بداء ندوة شعرية بين اعضاء قاعة الادب الشعبى. كل عضو مسموح له الاشتراك بعمل او اثنين على اكثر تقدير
يقوم بنشرهم هنا تحت هذا الموضوع
الندوة لمدة اسبوع ستقوم خلالها لجنة مكونة من خمسة نقاد يتم ترشيحهم من قبل ادارة الملتقى بتقيم الاعمال المقدمة بحيادية تامة واختيار افضل ثلاثة اعمال نشرت فى خلال هذه الندوة وهى كالاتى:-
المركز الاول
المركز الثانى
المركز الثالث
والفائزين الثلاثة سوف يحصلون على شهادات تقدير باسم ملتقى الواحة.
تمنياتى لكم بندوة سعيدة والفوز للجميع

أشكرك يا دكتور على طرح مثل هذا الموضوع الجميل
وأبدأ بنفسى
(

1)

جت سليمة
******
لما كان قاعد مربع
عمك الأستاذ فهيم
الخبر..
طار اتنقل له
والجيران وصلت تقول له شوف أوام
إلحق اوام
بنتك الغالية المصونة
شفت كانت راكبة فين؟
لما بيوصلها مين؟؟
طب تعالى وطل هتبص تلاقيها ..
وف إيديها الأخ مشمش
قام .. ماردش
واتسحب فى السكة يجرى واتصدم
يانهار أبوكى!!
حتى لما الناس شافوكى ،،
برضه ساحبة لى الخروف؟!
ردت النبرة البريئة :
عيب يابابا!
كل ماتشوفنى تناديلى؟َ!
هو انت مش عارف زميلى؟!!
أيوا مشمش ده زميلى
إيه؟!!
زميلك؟!!
(ثانية .. والبركان هِدى)
إيه يابنتى؟
مش تقولى!
كنت هتهور أنا ف لحظة شيطان
أعذرنى يابنى
والله كات زلة لسان
بس برضه الغلطة منها
برضه كان واجب تقول انك زميلها
عالعموم .. آدى يابنى راسك
والغلط مردود ولازما عالغدا
يابنى تآنسنا
- بس أصلى ....
-لأ مابسش
عيب عليك ترفض يا مشمش
ولا انا مش زى بابا؟!!
خد .. تعالى
والله واخدانى الجلالة انى ابوسك
وافرش الارض بورود
داحنا زارنا البدر مايل عالحدود
(بعد التعارف والغدا..)
(يتمرع عمك فهيم والفكرة طازة)
(ويميل على المحروس بكلمة )
قوللى يابنى:
لو صحيح مبسوط معانا،
ليه بقى ماتجيش تذاكر ويا نانا؟؟؟؟
ولا بابا يخاف عليك تخرج لوحدك؟
عيب
دا بيتك
هى دى مش زى اختك؟!
قوم أوام
ياللا عالأوضة المذاكرة
مش هعيد تانى الكلام
واقفلوا بابكم وراكم
النظام .. هو النظام
( يادى الهنا..يادى الهنا )
(عمك فهيم بيقوللهم اجمل وصية)
(النظام .. هو النظام)
هو النظام؟!
مانشالله عنهم ذاكروا ولا ماكانوا نفعوا
كلمنى قول
بنزين وعايم فى اللهب
نار جنب حزمة من الحطب
بتظن ايه؟!
النار ساعتها بتعمل ايه؟؟
(بالله عليك روح قوللهم)
لمين عيالكوا يمثلوا؟؟
تنبسطوا لو يتبهدلوا؟؟
ماحنا كده
بنحب دايما نختلف ولا نمتلك إلا الجدال
والعند فى نفوسنا الضعيفة المحزنة
بتخلى راجل وسطنا
.
.
زى الشوال
وبقول كفاية ،،
بعد اللى قلته لده وده
لحسن هزعل منى ناس بصين كده
ولو ان عمر الحق يوم مايكون سبب
أو يوم يزَعَّل
صحبة الخير اللى قالت
الحق فوق الراس
والراس دى ياما بتنحنى
ساجدة لرب الناس
ومادام بتسجد
الامر منه لابد هيفوق نفوسها
من بعد نوم ونعاس
ولا بد هيفوق نفوسها ..
من بعد نوم ونعاس

(2)
عودة ريّا و سكينة
_____
إتجَمّعت ..
ريّا اللى قالوا بتتشنق على باب زويلة
ويّا سكِينة المجرمة .. من ألف ليلة
طلعوا لنا من بين الحُفَر
و بيسألونا بالنَّفَر
بعد الحصار
إطلع لى بسلاح الدمار
هنفتّشوك ..
و نريحوك ..
من كل ظالم مفترى هنحرروك
و نخشوا عالجارة اللى جنبك بالندا
إصحى يا شبّة
يا حلاوته بيطل الدهب من بير غوييييييييييط
نَوَّر جبينك
وازاى صحيح هنصرحوا باللى ف قلوبنا ناحيتك
بس افتحى
راح نعزموكوا ف أرضكم
و بلاش من البن التقيل على دمكم
شعبك دا لُقطة
نايم لوحده من سنين
على كل طاعة و بالأدب متربيين
مايقولش غير حاضر .. نعم
ياللا افتحى
بإدينا راح تتمرجحى بحبال دهب
متقسمة طرفين عجب
طرف ف رقبتك ..
و التانى فوق برج الحمام
أصل احنا صناع السلام
حتى اسألى كل اللى جنبك
راح تعرفى إنا مَلَك
هندبحوكى بدون ماحتى ننمّلك
وابقى اعرفى
لو يوم قطعنا عنك المية اعرفى
علشان دى مية ملوّثة
بيقولوا دى البكتيريا جواها تجيب الهلوسة
راح نقطعوها
و من انهاردة الكهربة إفصل و شد
الضلمة هتعم البلد
و كفايا نورنا
و عشان تعيشى ف جو هادى
و من الليلة دى
إنسى الكيان
إنسى اننا ممكن نفوتك
أو يطلعوا قدامنا صوتك
قُصر الكلام
لو تفتحى
أو حتى مش راح تفتحى
أمرك خلاص بقى منتهى
و الرد منك صفر مركون عالشمال
و اللحظة حانت
نازلين يدوب نمْلى القلل
هنحصلوكى فى الطريق
خطتنا جاهزة بدون خلل
و ماتسأليش
ماتزوديش
ماحناش هنقبل نتسئل
ماحناش هنقبل نتسئل

(3)
تسعة خمسة .. تسعة خمسة
إتصل قبل امّا تنسى
كله بعد السحب فايز
عندنا مخزن جوايز
ياللا قوم اطلب أوام ان كنت عايز
خلى بالك
الدقيقة بنص أهيف
و بصراحة ان كنت هايف .. إحنا أهيف
قلنا لازما نسحبك من دم قلبك
إما تخسر .. أو هتخسر
بس إوعى ف مرة تسأل
أو تبص ف يوم وراك
لجل نقدر نلسعك من فوق قفاك
وبدون هذار
الحكاية ف أصلها لعبة قمار
نسألك و يكون سؤالنا
أغبى من مخ الحمار
واما هتشوف الفتورة
تركبك حالة شحار
غصب عنك
أو بخاطرك برضه لازم تتصل
و الطريقة اللى ف إيدينا
واحدة فى الإعلان بترقص
فيه طرق سهلة وْ رِخيصة
بس قلنا ان العرايا فى النهاية
برضه أرخص
ياللا قوم
طب لإمتى و فين هتقعد وانت بتعد النجوم
قوم و حقق ياللا حلمك
نوعدك .. هتبيع هدومك
هو ده منظر هدوم ؟؟؟
واوعى تنسى
تسعة خمسة .. تسعة خمسة
آخرتك ويانا هوسة
أو تلاقى الضغط عالى
تتلحس و تقول جرى لى
مش هقوللك تانى جرب
دى الدقيقة بنص أهيف .. نص أهيف
و بصراحة ان كنت هايف ....
هم أهيف

أرجو أن تنال النصوص استحسانكم ان شاء الله

بارك الله فيك اخى الفاضل الاستاذ محمود
دوما مبدع ان شاء الله

المراءة طفل صغير
.....لو تزعل داديها
.............ولما تثور.
ان مرة غضبت عليك
تلاقيها ف عنف التور.
ان كنت ليها حنين
.....تكونلك طاقة نور.
وان مرة تاسى عليها
.......تفور كما التنور.
فرس تحسن شكامه
يبقى لك طوع........
.............على طول

الأخ د فوزي ـ تحية طيبة
شكرا لك من القلب ، تحياتي محب
فكرة تستحق الثناء
أخوك محمد

المراءة طفل غيور
مصباح بنور
على حافة سور
اوعاك تثير زوبعة
ولا تكون بركان
اوعاك ف مرة تثور
ولا تكون زلزال
يهز قلب السور
تلقى القزاز انكسر
والضلمة بعد النور

معكم قلبا وقالبا د. فوزي

تحياتي لك أيها الفاضل على ما تقدمه هنا من أفكار