السلام عليكم أهل الواحه الكرام
تحيه خاصه لك د/ فوزى على مجهوداتك الطيبه
والف شكر على دعوتك الكريمه
اسمحوا لى ان اضع مشاركتى هذه للندوهأنا شاعر
انا شاعر ونفسى يااااه
فى مدينه تساع الكل
وأفلاطون واخد منى مفاتحها
ملضّمها كعقد الفل
وشايف من بعيد نورها
برغم الضل
نهار بيلوح
انا شاعر وعامل من حكاياتى
سفينة نوح
ومالك جوا كلماتى وحروفها
نواصى البوح
ألملمها وأنظمها
وأنثرها وأبعثرها
عبير ع الكل
وين ما تروح
تعالى معايا يالا قوام
واتمسك بمجدافى
وأرمى الحزن والالام
ورا ينبوع أمل صافى
وخلينا نشوف بكره
عيون صاحيه
ومش هتنام
غير امّا ترجع الانغام
فرح هيهل
ويتلاشى أنين النوح
تعالى نقوم نصحى الليل
ونغزل عشقنا مواويل
على السمره ام خصر نحيل
فى توب أخضر وطرحه تل
وخطاويها جنان ودوح
على ضفاف الامل ...والنيل
سلاسل فضه دى وللا ياناس تراتيل
لنجم الليل
بيتوضى فى نسيم الطل
وتسابيحه ترد الروح
خيال شاعرماهوش تهويل
ولا تضليل
دى احلامنا ودى قلوبنا هدى ودليل
بكلمة حب هنداوى جريح وعليل
وكلمة حق تفلق النهار م الليل
نقولها امام حاكم جائر
مادام بالصدق, ونجاهر
وقاصدينه كريم قادر
رحيم عدله ده فوق الكل
عليم بالنيه قبل البوح