ف الحقيقه أنا سعيد جدا بوجودي وسط شعراء كبار هنا في الواحه واشكر الدكتور ابو دينا على دعوتي لأكون معكم واتمنى ان اقدم لكم شيئا جديدا
انا عاوز اقول ان وش الواحه عليا جميل جدا لاني النهارده جاني خبر حصولي على المركزالاول على مستوى جامعة القاهره في شعر العاميه
وسيتم تصعيدي الى مستوى الجمهوريه عاوزين دعواتكم معانا بقى ماشي
القصيدة اللي فزت بيها هيه قصيدة السائل
بتمنى تحوز اعجابكم واتمنى ان استفيد من خبرات الجميع من الشعراء العظام في النقد ومتقبل اي نقد أيا كان
تحياتي
السائل
وخارج من سنه وسبعين ف دنيتكم
بايد توصلني بالعكاز
وايد تتمد
صعيبه الرحله من غير أهل
من غير حد
وانا عمري ماشلت الذكرى لامبارح
ولا القسوه
ولا مستني شكل الغد
انا القلب اللي كان أبيض
ولا اسودش
انا الآهه اللي تنخر ف العيدان لكن
ما بتهدش
انا الصخره
انا الصخره اللي أتقل من حمول الصبر
انا الصابر
انا الصبّار
وريقي أمر م العلقم
وروحي أخف من ضلي
ومال الدنيا مش مالي
أنا السائل طلب حسنه
ويفتكروني ما بحسش
ولا برثيش على حالي
تقيله الكلمه
بس أخف من جوعي وأحمالي
ولا عندي ميراث والدي
ولا عندي كنوز والي
ولا باتقن فنون النصب
انا الزاهد لكين بالغصب
انا الطواف ف عز الليل
ف عيني بتنطفي القناديل
وعمري ما اكل
عمري ما أميل
عصايتي واخده من عودي نحافتها
أصيله وعندها اخلاص
ولا توقعني ف الخيه
ولا تخونني وتتحول تصير حيه
انا الطواف وعمري ما أخاف
كلاب السكه أصحابي
وعارفيني من الخطوه
بلقى نوحي ف نباحهم
واجمع عيشي مع عيشهم
وافرش خيشي على خيشهم
ف ركن بعيد من لشارع
وكله ينام ويتغطى
وكله بيرضى ويطاوع
ونصحى الصبح لما اصبح يندهنا
ويمحي عنا صورة الامس
يوصلنا لطريق الشمس
بدون أجره
وارجع تاني للدايره
وأستجدي ف عطف القاعده والسايره
ويكسفني اللي يكسفني
ولا بقدر أحاسبهم
ولا بامشي ف مواكبهم
ولا تصيدني شباك الهم
غير من فوق مراكبهم
وجيت اليوم دا يمتكم
وقلبي دقته زغاريد
وحلم امبارح الماثل أمام عيني
بيشجيني
وجدت نهايه للدايره
وشفت نهايه زي العيد
وهربت مني تجاعيدي
وجوف قلبي ملاه النور
ملاه الطهر
وجاتني عديتي بالامر
جاتني عديتي أنهار
يا أنهار العسل والخمر
ووسط التوهه والملكوت
لمحت قصور عليها اسمي
ومتزخرف بروح رسام
صحيح الحلم بينسي
شقى الايام واذلالها وحوجتها
معادتشي على بالي
ولا كنتش على بالها
وبتعدي بتفاهتها وبهبلها
ولا بقدر أعاتبها
وانا موصول بعتبتها
وانا واقف على بابكم
ومش شايف شعاع الشمس دا النازل
وبيغازل سمار الوش وعيونكم
انا عيني على جيوبكم
ومش هاخجل كبر سني كما العاده
وهاطلب منكم الحسنه
دا انا من ساعة أما فقت من حلمي
ف يومنا ده
بلم القرش ع القرشين
عشان نفسي أجيب حتة قماش ساده
بلون أبيض
واعمل بيها لبس جديد
ميشبهشي ملابسكم
ولا ينفع يناسبكم
عشان عيدي اللي عمره ما جه ف تفكيركم
عشان عيدي اللي عمره ما كان ف يوم عيدكم