نصيحة لكل متعكر ،
وكل حزين
عشان ماتكون
صحيح الجتة متعافى
بقدم لك
فى وصفى كل متجرب
تعا قرب
وشد العُقب مالعلبة
بأمر الشرب
تدخنها بنفس الشكل قبل الأكل
من يومك تلت مرات
ولو هتشطب الكمية
هصرف لك مع التجديد
وماتملش
نصيحة من كتاب مفتوح
بإنك لو تدخنها هتدعى لى
سيجارة تمنع الدوخة
توسع صدرك المكتوم
تنشط فى الحياة دمك
ولا يهمك
وما تصدقش من ماتوا عشان شيشة
ياراجل عيب
دانا شاهد
ولسة فى الكلام جاى لك
سيجارة تفَتّح الشرايين
تمد العمر فينا سنين
تخَرَّج من شايف بقك الملموم
كلام أبيض
نقول تانى؟
سيجارة تطرح البركة فى قلب الرزق
تجيب لك من بعيد الحظ قدامك بقص ولزق
ترجع لك فى ثانية كل متغرب
ومهما يغيب ومهما فى البعيد هيطوف
أكيد ملهوف وهيقرب
وتانى نعيد
سيجارة تقتل الحشرة وضد الفار
تبدل مالأرق نومة
تشد وراها ألف ستار
عشان نختم
نصيحة للى متصاحب على صاحب
معاه داير كلام فى كلام
ومتوجع على صاحبه
وتقلب فى النهاية خصام
قالوها قبلنا مرة
عشان مانويت فى يوم تنصح
من الفجرية للعصرية دوّب له الكلام
أنغام
وقول واحكى
يفوت العصر علق فى الدماغ راحة
مابينا الناس بتتزين بشىء معقول
وطول مالعقل بيزين
وطول القلب مايقولّه طريقك فين
هيرجع لك
دا عمر السكة فى الضلمة مابتريح
ولو يسرح
لابد يعود
ولا يمشى ف طريق مسدود
ولا يمشى ف طريق مسدود