اللوحة الأولى من مسرحية ( احلام ولا اوهام )

فكرة العرض

البطولة حلم لكل انسان فمن منا لايحلم بأن يكون بطلا يتغنى بسيرته الجميع ولكن كيف ان تكون بطلا هذا ما نحاول الاجابة عنه . كما نحاول ان ندع الفرصة لعقولنا كى تحلم ولقلوبنا لكى تعيش الحلم ونقدم دعوة لترك الاحلام تعيش وتكبر مع العمل لتحقيقها . فما اكثر الحقائق التى كانت فى بدايتها مجرد حلم فلنلقى كل همومنا وراء ظهورنا ولنحلم ولنتمنى ان نحقق الاحلام .

اللوحة الأولى
( منظر الإستديج )

حديقة الجامعة ونتيجة معلقة وطلبة يلتفون حولها بلهفة ينتظرون ان يروا اسمائهم بين الناجحين .أما على الجانب الآخر يقف مجموعة من الأصدقاء صامتين ينتظرون وبجوارهم يقف اثنان من الأصدقاء بعد خروجهم من وسط الطلبة الملتفون حول النتيجة ويدور بينهم الحوار التالى :-

مازن : ( بحرقة ) حرام انت تنجح وانا اللى مغششك اسقط ده ظلم والله

شكلس : هههههههه هى كده يابنى انت تذاكر علشان انا انجح وانا مذاكرش علشان انت تسقط

مازن : ايوه افرح مانت مش هامك

شكلس : ويهمنى ليه مش نجحت

وهنا تتداخل اصوات الطلبة بين بكاء وافراح وفجأة ينطلق احد الفرحين هاتفا ( نجحت ........ نجحت ) وهو يتجه نحو الاثنين الذين يكون انضم اليهم امير و هانى بينما يخرج باقى الطلبة من الاستديج ومازالت اصواتهم تتواصل ما بين الفرحة والحسرة . ويخرج معهم مازن .

ايمن : نجحت .... نجحت

شكلس : ( بتهكم ) فرحان قوى

ايمن : ومفرحش ليه بقولك نجحت يعنى خلاص هانطلق للحياة العملية هاحقق كل احلامى

شكلس : هههههههه ( ضحكة تهكمية ) وبعدين نجحت وخلصت هتعمل ايه ماهتاخد الشهادة وتعلقها فى برواز على أى حيطة فى بيتكم ومفيش شغل محدش بيتعين اليومين دول ولو حصل واتعينت هتاخد ايه مرتب بنصرفه فى يوم ولا اثنين وقال ايه مطلوب منك تعيش بيه شهر كامل وتشيل منه علشان تكون نفسك . ولو اشتغلت فى القطاع الخاص مش مضمون هتبقى تحت رحمتهم .

هانى : يابنى انت متشائم ليه احنا مش هنستنى نشتغل احنا هنعمل مشروع صغير ونكبره ونكبر معاه

شكلس : انتوا بتحلموا ومصدقين الحلم

امير : ليه بقى يافالح

شكلس : احنا فى زمان مينفعش فيه الكلام ده احنا فى زمان ازاى تعرف تعيش حياتك وفى نفس الوقت تجيب فلوس من الهوا غير كده مش هتعيشوا

هانى : ازاى بقى ياعم الفيلسوف تجيب فلوس من الهوا

شكلس : اعملوا زى مثلا كل اسبوع مع بنت شكل ارسم عليها دور الحب والغرام لحد ماخد منها فلوسها واعيش معاها شوية وبعد كده اسيبها واروح لغيرها

امير : انت بتتكلم زى النصابين احنا مش زيك احنا لازم نبقى حاجة لازم نعمل حاجة احنا لازم نبقى ابطال زى ابطال حرب اكتوبر زى ناس كتير عملت لمصر مش لازم نحارب احنا ممكن نكون ابطال بعملنا اننا نطور بلدنا اننا نبنى حضارة زى حضارة اجدادنا الفراعنة اللى عملوا حضارة ال7000 سنة اللى عايشين منها وعليها دلوقتى .

شكلس : هههههههه ... يابنى الزمن اتغير الزمن ده مش زمن بطولة احنا عايشين فى زمن ازاى تجيب فلوس ازاى تعرف تعيش ازاى تلاقى الاكل اللى هتاكله مش مهم ازاى المهم تلاقيه . احنا فى زمن القوى فيه بياكل الضعيف . خلاص الكلام اللى انت بتقول عليه كان زمان كان ايام مكانت الناس لاقيه تاكل كان الجنية بعشرة من جنيهات اليومين دول ماحنا اديلنا من 34 سنة من حرب اكتوبر عملنا ايه ولا حاجة بالعكس الفساد بقى كل مكان كل ده ليه الناس مشلاقيه تأكل ولادها من مرتبات هزيلة بتشحتهالهم الحكومة ولا الاسعار اللى كل مانسمع انه فى زيادة فى المرتبات نلاقى قدامها زيادة الضعف فى الاسعار . احنا خلاص بقينا فى زمن تانى .

هانى : زمن تانى ايه علشان اللى زيك ياكلوا ويشربوا ويناموا ومش عايزين يتعبوا ماهو ده اللى مرجعنا لورا دايما . مفيش حلاوة من غير نار .

امير : وبعدين تعبنا ده مش لازم يكون مكافأته فلوس .. آه احنا فى زمن مادى لكن لما العالم يقف ويقول بصوا وشوفوا المصرى ابن مصر عمل ايه دى اعظم مكافأة زى احمد زويل اللى بهر العالم كله باخراعة العظيم ( الفيمتو ثانية ) احنا لازم نكون زى الناس دى اللى شرفت مصر ( طلعت حرب ... طه حسين .. نجيب محفوظ ... انور السادات .... ام كلثوم .... احمد زويل ..... وكتير زيهم فى كل المجالات ومستنوش حاجة من حد بالعكس هما اللى حاولوا لحد ماوصلوا علشان يردوا الجميل للبلد اللى علمتهم للنيل اللى شربوا منه لمصر اللى بتشرفنا )

شكلس : يابنى انت وهو الناس غيرت طعم الحياة وكل وحش بقى حلو والحلو تاه وسط الوحشيين ..اهه اقنعه وهدوم خداعة ودوامة بتطحن كل الناس وفى ناس عايشة فى شكل مش ليها ... انسوا ...انسوا انتوا عايشين فى الاحلام انزلوا لأرض الواقع .............. وهو خارج من الاستديج

امير : نحلم وماله نحلم يمكن الحلم يبقى حقيقة فى يوم من الأيام .............. كأنه يكلم نفسه

هانى : فعلا ماللى قبلنا حلموا وقدروا يحققوا حلمهم يبقى ليه منحلمش ....... كأنه يكلم نفسه

استعراض الأحلام

نحلم واحنا عايشين نحقق حلمنا قادرين
طول ماحنا فاكرين المجد اللى كان
والصبر مع الزمان يبقى احنا اكيد قادرين
نحقق الاحلام ونرجع اللى كان
طول ماحنا اللى عايزين
يبقى احنا اكيد قادرين
نحقق الاحلام واحنا عايشين

انتظرونى مع باقى المسرحية

اللوحة الثانية
( منظر الاستديج )

حديقة عامة (يمكن إستغلال الديكور السابق ) حيث تقف فيها دودى وحيدة تفكر بينما تدخل جمالات
جمالات : هو انتى هنا وانا قالبة الدنيا عليكى
دودى : خير يا جمالات فى حاجة
جمالات : آه طبعا بس قوليلى انتى واقفة هنا ليه
دودى : مستنيه حبيبى
جمالات : حبيبك مين حبيبك يا بختك
دودى : عايزة ايه
جمالات : انا كنت عايزة طلبين كل واحد فيهم محرج أكتر من التانى
دودى : لأ قولى عايزة مفيش إحراج بينا وبين بعضينا مش احنا اصحاب
جمالات : اول حاجة كنت عايزة فلوس
دودى : بس كده انتى هايفة قوى انتى عايزة كام
جمالات : يعنى 500 / 600 جنية
دودى : خدى 600 جنية ( وهى تخرج الفلوس من شنطتها )
جمالات : شكرا
دودى : عايزة ايه تانى
جمالات : كنت عايزة منك طقم اروح بيه مشوار
دودى : مشوار ايه
جمالات : اصل ليه واحد جارى ظابط هاروحله علشان يخلينى اغنى وامثل
دودى : ههههههههههه بتقولى هيخليكى ايه
جمالات : هيخلينى اغنى وامثل
دودى : ماشى ياستى بس انا معنديش حاجة تنفعلك كل اللى عندى مينى جيب وحاجات زى كدة
جمالات : ماهو ده المطلوب علشان الفت نظرة
دودى : خلاص ابقى عدى عليا فى البيت خدى اللى انتى عايزاه
جمالات : شكرا انا مش عارفة اقولك ايه
دودى : متقوليش احنا اخوات
جمالات : اه اخوات والاخوات لبعض مهما ان كان
دودى : انتى متأكده ان الظابط ده هيخليكى تغنى وتمثلى
جمالات : طبعا انا ضامناه فى جيبى .. انتى عارفة بفكر فى ايه
دودى : فى ايه
جمالات : انتى بتغنى وترقصى حلو قوى متيجى معايا اخليه يشوفك ويخليكى تغنى
دودى : لأ انتى عايزة بابى يموتنى
جمالات : ليه هو عيب ولا حرام
دودى : بابى مش عايزنى لااغنى ولا امثل
جمالات :بابى .. طيب .. إلاقوليلى عملتى ايه فى النتيجة
دودى : نجحت ....( بزعل )
جمالات : مالك بتقوليها وانتى مش فرحانة كده ليه
دودى : اصل شكلس حبيبى كان مواعدنى نحتفل بالنتيجة مع بعض وانا مستنياه ولسه مجاش
جمالات : هو ده اللى مزعلك
دودى : آه روحى بقى وانتى رخمة
جمالات :طبعا رخمة دلوقتى ماهو لو مش مستنيا حبيب القلب ابقى صاحبتك واختك وحبيبتك وكل حاجة فى دنيتك
دودى : انتى زعلتى .. ارجوكى متزعليش انتى عارفة انى مقصدش
جمالات : لأ مزعلتش .. بس انا حبيت اطمن عليكى واعرف ناوية على ايه بعد ماخلصتى دراسة هتشتغلى ايه يعنى
دودى : انا مبفكرش انى اشتغل دلوقتى
جمالات : امال بتفكرى فى ايه
دودى : بفكر فى شكلس حبيبى هيعمل ايه هنتجوز ولا لأ
جمالات : خير ان شاء الله اكيد هيتجوزك طالما بتحبوا بعض انتى عارفة الحب ده اعظم شئ فى الدنيا
دودى : يارب ... مانا عارفة ان الحب ده اعظم شئ فى الدنيا الحب ده احساس جميل ... تضحية ... وفاء .... اخلاص
جمالات : خلاص انا هبقى اعدى عليكى بالليل فى البيت علشان اخد الطقم وابقى طمنينى عملتنى ايه مع شكلس
دودى : خلاص ... يالا باى
جمالات : باى
( وهى تخرج من الاستديج لترجع دودى الى وحدتها تفكر فى شكلس لماذا تأخر عليها)

[web]http://haithamdahshan.maktoobblog.com/?post=249225[/web] ( مدونتى )

سلام الـلـه عليكم
الأخ الفاضل الأديب هيثم مجدي الدهشان

لوحة سلسة التركيب , بنيت بشكل لابأس به من الناحية التشويقية , ولكنها لم تحوي
كافة الايحاءات المطلوبة , ربما لانها جزء من عمل , ولكي تكتمل الصورة , لابد من
الاطلاع على بقية العمل .
والشيء الآخر والذي اريد أن أهمس به , أننا في الواحة المباركة , لسنا مع الاعمال
في اللغة العامية , لأننا نؤكد على استخدام اللغة الفصيحة , من منطلق الحفاظ على
تراثنا العربي , وارتقاء باللغة والأدب .
تقبل احترامي وتقديري

د. محمد حسن السمان

اللوحة الثالثة

( منظر الاستديج )

نفس المنظر السابق الحديقة وتقف فيها دودى وحيدة فى انتظار حبيبها شكلس . ثم يدخل شكلس مسرعا متجها الى دودى .

دودى : ايه اللى اخرك ده كله مستنياك

شكلس : انا اسف جدا يا عمرى وروح قلبى غصب عنى

دودى : انتى بتحبنى يا شكلس

شكلس : طبعا ياحياتى وروحى هو ده برضه سؤال دا انتى عمرى وكل ما ليا فى الدنيا

دودى : انا مش عايزة اسيبك ابدا ياحبيبى انت كل احلامى

شكلس : وانا ياعمرى مش عايز ابعد ابدا انتى حلم السنين ونور العين ومهجة القلب .... بس انا كنت عايز منك طلب ممكن

دودى : طبعا ممكن ياحبيبى وعمرى ايه هو الطلب

شكلس : انتى معاكى فلوس

دودى : طبعا انت عايز كام

شكلس : 1000 جنيه وهديهمولك لما بابا يرجع من امريكا

دودى : ( تخرج الفلوس من الشنطة وتديهومله ) بس كده ياحبيبى انت تاخد عينيا دا كل حاجة فيا ملك ايديك مش عايز حاجة تانية

شكلس : اه بس انا عايز ( ويميل على اذنها ) عايز بوسة

دودى : بتقول ايه مش سامعة

" يدخل بائع الفل "

بائع الفل : الفل جميل .. الفل يافل ....يابو ريحة جنان يافل حد عايز الفل عايز الفل ياباشا

شكلس : مش عايز مش عايز ............. اف بقى

بائع الفل : الفل الجميل وانتى يا هانم ده الفل رحته حلوة وجميلة

دودى : مش عايزة يارخم سيبنا فى حالنا ...... احنا كنا بنقول ايه .

يدخل بائع الاكل

بائع الأكل : سميط وبيض وجبنة ....... سميط ياباشا ....... جبنة يا هانم

شكلس : كده حرام انا مش عارف اقعد

بائع الاكل : وماله نام ياباشا ....... بيض ياهانم

دودى : انا مش عايزة بيض مانا معايا اهو احلى من البيض سيبونا فى حالنا بقى ..... احنا كنا بنقول ايه

بائع البيبسى : حاجة ساقعة بيبسى ايوه الساقع كولا بيبسى ايوه المثلج ساقع يا حضرة

شكلس : انت اللى ساقع وغلس

بائع البيبسى : تشربى حاجة يا حلوة

دودى : اشرب من دمك سيبونا بقى انا مستقبلى متوقف على اللحظة دى احنا كنا بنقول ايه شكلس انت مش بتحبنى يبقى هتتجوزنى امتى

شكلس : ها ...... أكيد قريب يا عمرى لما بابا يرجع من السفر هنتجوز علطول المهم فين البوسة

يدخل بائع الترمس

بائع الترمس : الترمس المملح حد عايز ترمس مملح الترمس ....... يا ترمس

دودى : مش عاوزة مش عاوزة .......... انا هموت بقى

يخرج البائع

دودى : انت هتذاكر هتتنيل تبوس ولا لأ

انتظرونى مع المشهد الرابع وماذا يفعل والد دودى ليحمى ابنته وينقذها من براثن شكلس

:NJ:

اللوحة الرابعة

( منظر الاستديج )


مكتب المخبر السرى والامن الخاص

" يرن التليفون ويرد صاحب المكتب "سامى" فى كبرياء وفخر مصطنعين "

سامى : الو ......... ايه فى ايه .......... انتى متأكدة ...... زبون ....... ايه مليونير ...... هو كده الشغل خليه يدخل بسرعة ....... بسرعة .......... لا استنى ايوه كده .......... بسرعة بقول بسرعة

" يدخل عاصم بك فى كبرياء وتعالى "

سامى : اهلا .... اهلا يا فندم .... اتفضل

عاصم : عاصم كاظم سالم المليونير المعروف

سامى : وهل يخفى القمر انت وسام على صدر كل مصرى يا فندم

عاصم : شكرا شكرا .. انا جاى فى موضوع مهم .......

سامى : (مقاطعا) ايوة بس لازم تشرب حاجة الاول يافندم

عاصم : انا مش جاى اشرب انا مش فاضى انا عندى ميت حاجة انت فاهم ... فاهم ولا.....

سامى : فاهم ... بلاش تشرب بلاش ... طيب ناكل لقمة مع بعض على السريع كده

عاصم : انت مش بتفهم مش عايز أى حاجة انا جاى فى حاجة مهمة جدا

سامى : اتفضل انا تحت امر الحاجة المهمة دى .... اتكلم

عاصم : بنتى هتتجوز ..........

سامى : ( مقاطعا ) يا فندم احنا مكتب تحريات .... المأذون فى الشارع اللى ورانا

عاصم : انت هتسكت وتسمع للآخر ولا ابطط راسك اللى عاملة زى الكرمباية دى اسكت انا عارف انه مكتب تحريات خاصة وعارف انك مش مأذون بس سيبنى اكمل

سامى : اتفضل

عاصم : بنتى هتتجوز ولد صايع من بتوع ال3 ورقات عايز يضحك عليها انت عارف بقى شباب اليومين دول

سامى : طبعا ...... طبعا وبعدين

عاصم : انا بقى مسافى فرنسا بعد بكرة ومش هاكون فى مصر وعايز حد يمنع انها حتى تقابله مش تتجوزه ... انا ممكن امنعها بالقوة بس البنت رقيقة ومتستحملش كده عشان كده عاوز مخبر من عندك يحافظ عليها لحد مارجع ايه رأيك يا سيد

سامى : انا مسميش سيد يافندم انا اسمى سامى

عاصم : سامى حرامى انا ماليش دعوة ايه رأيك

سامى : تحت أمرك يا فندم انا هكلف اقوى مخبر عندى واعظمهم بطولة مفيش غير كولومبوز هو اللى يقدر يعمل الحاجات دى

عاصم : كولومبوز بامبرز مش مهم المهم بنتى يا سيد

سامى : سامى والله اسمى سامى

عاصم : والله انا هموتك ... انده على بزازه بتاعك ده

سامى : " يرفع السماعة يكلم السكرتيرة " ايوة .... اندهيلى كولومبوز بسرعه من مكتبة ومعاه سفنجة

عاصم : انتوا بتعملوا التحريات بسفنجة

سامى لا سفنجه ده المساعد بتاعه

عاصم : " يضحك " سفنجه ...... ده بيمسح بعد التحريات

" يدخل كولومبوز وخلفه مساعده سفنجه على مقشة وكأنها دراجة "

كولو : تحت أمرك يافندم

سامى : عاصم بيه زبون يا كولومبوز

كولو : اخيرا حد عبرك ..... اهلا يا محمص بيه

عاصم : عاصم كاظم سالم مليونير

كولو : كولومبوز شاورمز فراخوز ..... مفلسير

سامى : بنت الباشا هتكون عينيك فيه عيل بيحاول ياكل دماغها لازم تبعد عنه

عاصم : ايوه وان نجحت هتاخد فلوس كتير خد ياسيد دول 3000 جنيه حلوين

سامى : الا حلوين دول حلوين جدا كل حاجة فيهم حلوه الشكل واللون والطعم

كولو : كام 3000 جنيه ( يغمى على سفنجه )

كولو : يضرب سفنجه بالمقشة وهو يقول فوق بقى

سفنجه : وانا يا عم عايز ربع جنيه

سامى : بس عيب ربع جنيه يا شحات فضحتونا ....... احنا تحت امرك يافندم

عاصم : يعنى اسافر وانا مطمن على العموم دى الصورة بتاعت بنتى والورقة دى فيها كل حاجة ممكن تحتاجوها عن الكلب اللى بتحبه

سفنجه : هى بنتك بتحب كلب ..... عادى مانا بحب قطة هى بتنونو وانا اهواهو ... هى تنونو وانا اهواهو

عاصم : ده عبيط ولا ايه انا مش عايز اوصيك ....... باى

سامى : كولومبوز من الفجر لأ من دلوقتى الواد ده مايشوفش البنت دى . ( وهو يعطيه الصورة والورقة )

كولو : حاضر يافندم

( منظر الاستديج )



بيت كولومبوز وهو نائم وبجواره مساعده سفنجة فى استرخاء تام فى وضع غير عادى

سفنجة : ( يحلم ) انا ماليش دعوة ....... خلاص انا هقول على كل

حاجة........ شفت ايه خير اللهم اجعله خير واحد لابس ابيض فى

ابيض وماسك فى ايده كوز كبير الامونيا ومعاه كوز صغير

العجيب انه برضه الامونيا وماشى عمال يقول لبن طازة يالبن

..... وبعدين مر واحد لابس ازرق فى ازرق ومعاه مقشة كبيرة

عمال يقول صبحنا وصبح الملك لله وعمال يكنس فى الشارع

......... نعم انتوا هتجيبولى الشارع عماره عماره دور دور شقه

شقه نفر نفر

" يدق الباب بشدة وبسرعة كبيرة "

كولو : ( وهو يلكز سفنجة ) سفنجة قوم افتح الباب ........ انت يابنى

بطل شخير وقوم افتح ...... انت يابنى بطل شخير واحلام وقوم

افتح ...................... يوووه يووه " يقوم لفتح الباب " حاضر

حاضر جاى " يفتح الباب " ايوه ست جمالات اتفضلى اى خدمة

جمالات : معلش لو كنت جيت فى وقت غير مناسب اصلى عارفة انك دايما مشغول

كولو : لأ ميهمكيش انتى تشرفى فى اى وقت تحت امرك

جمالات : انت مش قولتلى انك هتخلينى اغنى فى التليفزيون والاذاعة

وقناة ال w.c .

كولو : انا تحت امرك بس انتى تعرفى تغنى

جمالات : طبعا انا بغنى وارقص وامثل واكنس واغسل وامسح وعليا

طبق جبنة رومى محصلش

كولو : كفاية كفاية انتى مطربة شاملة ولا خدامة شاملة طيب يا ست

جمالات هبقى اسمعك بعدين

جمالات : وليه مش دلوقتى انا نفسى تسمعنى وتحس بيا وبصوتى

و..........

كولو : ( مقاطعا ) انا جتتى مش خالصة ..... خلصينى وغنى



"تغنى على صوت شخير سفنجه "

كولو : جميل قوى ..... جميل خالص بس انا حاسس ان الاسلاك

الصوتية عندك عايزة تتشحم قصدى الاحبال الصوتية عايزة

تتشد انا هبعتك لمدرب بنج بونج يشد احبالك خدى الكارت ده

بتاعى روحيله وهو هيعمل الازم

جمالات : ياخد عدوينك وهو هيشغلنى فى قناة البند بوند دى ايه

كولو : حاجة من الاتنين ياكورة يا شبكة وممكن مضرب

جمالات : شبكة السى ان ان

كولو : اطمنى انتى هتبقى مضرب المثل للمطربة الصايعة قصدى

الصاعدة .... مع السلامة ايه الغلب اللى انا فيه ده حتى فى البيت

مش عارف انام .

السلام عليكم ورحمة الله

استوقفتني كلمة أستاذي (توفيق الحكيم ) عندما قال (بحثت في فنون الادب فلم أجد غير الفن المسرحي أكثر ترتيباً ونظاماً ) .

أخي الفاضل ....

أعتب عليك نشر مسرحيتك بهذا الشكل المشتت ، كنت أتمنى منك أن تنشر المسرحية كاملة دفعة واحدة ، وبشكل مكثف يمكن التفرغ لقراءته من خلال الشابكة ، فأنت تعلم جيداً المشاكل التي تواجهنا مع طول القراءة هنا ... لكن عملك رائع ، ومحل تقييم ... وإن كنت لا أعلم عن هذا الفن الكثير .
دمت مبدعاً

الدهشان..
احلاك واوهام...
نص مسرحي جميل لكنه في نظري يحتاج الى تكثيف اكثر، والى وحدة اكثر، وكما قال البوهي الرائع
لو نشرت كاملة لكان افضل لانك هنا تشتت فكر المتلقي الذي قد لايستوعب الاحداث التي تاتي بعد هذا الفصل.
لكن ذلك لايتعني ابدا ان النص ليس رائعا وذا قيمة ادبية وفكرية عالية

دمت بخير
محبتي لك
جوتيار

أشكرك على جهدك وإبداعك ..
لكن كان أن ينبغي عليك كتابتها بالفصيح تبعا لقوانين الواحة
تحياتي