دستور يا اسيادى دستور..
دستور يا اسيادى دستور...
ما خلاص عَدِّلنا الدستور...
لجل جنابك ويا جنابى...
نفضل عايشين نفس الدور...
انت حتفضل دايما جحش...
أما سيادتى فحبقى التُور...
أصل الوالى اللالى اللالى...
أبو دم خفيف وشحرور...
حيسلَّمنا لنونو الغالى...
النُّغَّه الحلو الأمور...
بس اوعى لسانك يتكحول...
أو تتكعبل فى المحظور...
حتلاقى جنابك متبهدل...
يا مدهول خلِّيك فرفور...
واعمل مش فاهم واستهبل...
والبس فوق راسك طرطور...
واهتف للوالى بصوت عالى...
والشبل الحلو الغندور...
وادخل فى الموكب واتموكب...
ولاَّ اتشعلق فى الحنطور...
والعن أبو أم معارضينه...
من إسنا لحد دمنهور...
والعن أبو خاشى ماتخشاشى...
بس لايمنى على الكستور...
واظهر فى المنظر واتمنظر...
وادخل جوه الجُوقَه ودُور...
قُل له الناس بتقول لجنابك...
عصرك عصر الهَنَا والنور...
إوعى تقول الناس تعبانه...
لو يتعشوا ما يلقوا فطور...
واقعد فى المجلس واتمجلس...
واتمحلس حتعيش فى سرور...
واعلن فى القاعه بمياعه...
إن مفيش واحد مقهور...
قول دى حكومه صحيح مهضومه...
زى السكر جوه الزور...
قول دى حكومه صحيح مظلومه...
والشعب دا كلب ومسعور...
وان قالوا الناس بره بتنزف....
إكدب واحلف ان دا كله كدب وزور...
واحلف ع النعمه وع الخِتمَه...
لجل تعيش دايما مستور...
قول الناس عايشين فى الراحه...
وبيفطروا كحك وبتى فور..
قول للوالى عشقك غالى...
والشعب فى حبك معذور...
يا مريَّشنا ومنعنشنا...
وبانى لنا فيللات وقصور...
بس سؤال واحد لجنابك...
مين هو الاستاذ دستور...
رد مع اقتباس
رسول الله أسألك الشفاعة = وقربا منك يا نهر الوداعة
المشاركة الأصلية كتبت بواسطة د. فوزى أبو دنيا
