لاَ تَقْرَا أَمَانْ
لاَ تَقْرَا أَمَانْ لاَ تْرُومْ الْحْيَّه
وِاللِّي سَوْلْكْ قُلْ أَنَا عِجْلاَنْ
الْقْلُوبْ تْلَوْنَاتْ وْقْلاَلْتْ النِّيَّه
مَا بْقَاتْ ثِقَة فْهَاذْ الزّْمَانْ
يْجِيوْكْ نَاسْ بْصِفَة مِرْضِيَّه
يْكْلْمُوكْ عِلْ الْأَصْلْ وْالْإِيمَانْ
لِيَّامْ دُّورْ وِتْبَانْ السِّيَّه
وِتْجْبْرْهُمْ نَاسْ رَاكِبْهُمْ شِيطَانْ
الجّْلْدْ مْخْيّْطْ وِلْبْرَة مِنْسِيَّه
وِالْعَقْلْ عَامْرْ بِمَا هُو فِنْيَانْ
الْقَلْبْ لاَهِي صُبْحْ وْعْشِيَّه
وِبْتْبْنْ الدّْنْيَا جُوفُو مْلْيَانْ
يَدْ الْكْبَارْ بِالظّْلْمْ مِطْلِيَّه
مَا بْقَاتْ حُرِّيَّه فِالوْطَانْ
الْحْقُوقْ فْالرْفُوفْ مِطْوِيَّه
وِالْوْعُودْ مُوجُودَة مِنْ زْمَانْ
وِلْدْ الْغَنِي حَاجْتُو مِقْضِيَّه
تْرَاهْ دِيمَا غَادِي زِرْبَانْ
وِلْدْ الْفَقِيرْ مِحْنَاتُو الطّْنْجِيَّه
يْلاَ جْبْرْ الْغْذَا يْقَيِّلْ جِيعَانْ
حَالْنَا بِينْ الْبُلْدَانْ شْقِيَّه
وْقْلُوبْنَا مْدَنّْسْهَا الْبُهْتَانْ
رْبِّي مَا يْغَيّْرْ فِيكْ وْقِيَّه
حْتَى تْغَيّْرْ نَفْسِكْ يَا إِنْسَانْ