آه يا بلد
مكتوب عليكى الانكسار
والانحدار
من تحت كرسى لكعب جزمه
لتحت أسفل سافلين
آآآآه يا بلد
مدعى على ولادك يعيشوا فى الهوان
وتردى ع الدعوة آمين
ويا مين ينور سكتك
وف خطوتك مليون وجع
واللى اتوجع
الآه فى قلبه بتتحرق من خوف لخوف
ودموع فى عين
ما عارفه يوم تقدر تشوف ..
.. لحظة براح
ما اللى إتولد فى العتمه راح
من ويل بكانا المستباح
وجراح ما فيه ليها عدد
آآآآآه يا بلد
يا حلم فى المهد اتوأد
ما الليل طرح كلاليب تشد ...
.. الفرحه تبدرها عويل
ودموع تسيل
تروى جفاف حضنك يا نيل
ويا عين يا ليل
يا توهه محتاجه دليل
وبديل يهد المستحيل
يعلم بأن الله أحد
آآآآآآآآآآآآآآآه يا بلد