كرباج ورا يا اسطى
عشان الحبكة ما هيش محبوكة
ويلعن أبوكا.. إن كان هايبيعك
علشان يفضل شيخ الحاره
وبدل العجله يجيب طيارة
يسافر بيها من باب بيتكو
لباب لا مؤاخذه الست جارتكوا
يبوس جزمتها
عشان صاحبتها
ادتله الفكه .. وحتة ترته
وحطه يا بطه
بقينا ف ورطه
عشان الاورطه خلاص اتلموا
علينا وعزموا
الديب على لحم كتافنا ... وخوفنا
اللى مكتفنا
وخلا النهش يا هوووووووه على ودنه
وودنه الباشا خلاص ما عادتش بتسمع بوحنا
اللى بيدبحنا
وخلا ارواحنا تفوت مطارحنا
وتهرب بره
عشان الجرّه ... خلاص اضيقت
وأما اتشقت
والنور شق علينا الضلمه
زعلوا الظلمه .... وسدّوا الشق
وهأ هأ هأ الفالحين فيها
وبنقويها
بكسرة عينا
والله يعينا
على اللى ذاللنا
ومبهدلنا
ومخللنا فى براميل ليلنا
وان يوم مره نفضنا الملح وقولنا عقلنا
يبقى يا ويلنا
هايغسلنا ... بدمع عنينا
ودم عيالنا
وبدل الملح هانغرق شطه
وحطه يا بطه
كفايه يا أسطى
خلاص انا نازل