صحيت م النوم وانا فاكر
بواقي الحلم في الآخر
بتكتبلي وانا الشاعر
قصيدة شعر ف إديها
وجوا القلب حطتها
فركت عنيا بإديا ورن البوسطجي جرسي
فتحت الشيش
وكان شعري ساعتها كنيش
سألني:"مصطفى عمار؟"
جاوبت وقبل ما فكر
لساني طلقة بتفجر مشاعر جوا مكتومة
أناعمار
ومين غيره
هتفتكره
تبعتله قصيدة حب
وكان قلبي بيتنطط من الفرحة
اكيد في الظرف صورتها
وهيا لفه لي الطرحة
نزلت السلم اتمختر
لقيت البوسطجي مكشر!
صباح الفل
صباح الفل ع الحاضر
وع المستقبل الراضي
وع الماضي
ماتمضي يالا يا استاذ
بقلبي ؟
ولا بدراعي؟
ما انا ماضي
مخدت الظرف في حضني
وانا اللي عشانه مستني
وصلت لشقتي فرحان وخوفت الناس تكون بَصَّة
فقلت الباب مع الشباك
وغنى القلب انا بهواك
فتحت الظرف لجل افرح
بأجمل فلة راح تطرح
بأحلى عطر في الدنيا
فتحت الظرف في ثانية
مفيش فلة!!!!
مفيش صورة!!!!
يدوب حتة صغيورة!!!!!
ومختومة بختم النسر
تعالى الساعة تسعة ونص؟؟؟؟؟؟؟
في أمن لدولة عايزينك!!!!!!!!!!!؟؟؟؟؟؟