الاتوبيس
كنت أقلب في دفاتر أشعاري فوجدت قصيدة عامية قد كتبتها قبل عام من نقل تمثال رمسيس من ميدان رمسيس إلى المتحف المصري في موكب هائل كان العالم كله يتابعه .
فهل تم نقله بسبب هذه القصيدة
لا أدري........ربما!!!!!!
الاتوبيس دا حبيب الشعب
دايما يستحمل زحمتهم
دايما يتعب لجل راحتهم
بس الناش ما بترحمهوش
دايما فرك ودهس وحوش
يارب اصرف عنا و حوش
لم الشعب وعاش الدور
النشال ويا الدكتور
مرة ركبته مغرور فيه
كنت سعيد
إني تحت سماه وفـ أرضه
إني عرفته بطوله وعرضه
أصله تخين
يمشي حبة ويعطل حبة
بس وصلت بحمد الله
روحت أخش الجامعة بتاعتي
الحارس ع الباب مارضاش
قال: كارنيهك
قولت: معايا
:طلعهولي
حطيت ايدي ناحية جيبي
صرخ القلب ورفص جوا القفص الصدري
هرب الدم ولفت راسي من غير ما ادري
ع الاتوبيس
قولت هرن لواحد صاحبي في الكلية
لحسن خيبتي الوقتي قوية
حتى مبايلي مالقيتهوش
أعمل ايه دلوقتي يا ربي...؟
المحفظة ويا التليفون راحوا مني في الاتوبيس
روحت أطلع رقمي القومي
قالو قدم في الموديرية
روحت اقدم قالوا بكرة
أصل خلاص احنا الضهرية
روحتلهم تاني الصوبحية
واحد قالي: تعرف عم فؤاد مدبولي
قولتله: لاعرف لا مدبولك ولا مدبولي
انا طالب وبطاقتي اتنشلت
قالي : اتنشلت منك فين
قولتله: طبعا في الاتوبيس
قالي : خلاص قدم شكوة في الاتوبيس
قولتله: فين
قالي : عند مدان رمسيس
روحت الصبح ركبت القطر
علشان ألحق مكتب مصر
جوا القطر قابلني واحد لابس بدلة
قالي : ياشيخ وريني بطاقتك
قولتله : ضاعت
قالي : ضاعت؟
قولتله : أقسم
قالي : ابقى احلف جوا القسم
جوا القسم سألني واحد : إيه الاسم؟
قولت: الاسم ثلاث أنواع
فيه نوع ظاهر فيه نوع مضمر فيه نوع مبهم أما الظاهر....
بس اتنيل
احنا بنسأل : اسمك ايه؟
قولتله : اسمي؟ كان مكتوب في بطاقتي يا بيه
الظابط قال للي بيكتب: سيبك منه وابعت هولي
أيوا يا شيخ بتزعق ليه
قولتله : انا يا سعادة البيه
طالب واتنشلت محفظتي
وقمت حاكيله القصة بتاعتي في الاتوبيس
قالي : خلاص احنا هنسيبك
علشان خاطر سيدي وسيدك
الاتوبيس
قولتله يحيى العدل يا بيه
بس عشان اوصل رمسيس اركب ايه؟؟
قالي بقولك ايه يا خفيف
ضور واسأل مش فاضيين
وخرجت اضرب كف ف كف
زي ما اكون لفة بتتلف
لعبة ف إيدهم
أو شخشيخة
أو خاتم ملبوس في الكف
أسأل واحد قال مااعرفش
اسأل غيره يقولي ماعدش
واللي يقولي تعالى بكرة
واللي يقولي هات الاجرة
واللي يقولي شمين ف يمال
بس وصلت
واما وصلت ميدان رمسيس
شوفت بعيني ميت اتوبيس
دا بينادي بالتحرير
ودا بينادي بالحرية
والتمثال ما بيتكلمش
يبقى اكيد رمسيس دا رأيسهم
امال واقفين جنبه ليه
يبقى اكيد هم بيتقاسمم في النقدية آخر الليل
يبقى هلاقي المحفظه عنده
قمت مقرب حبه منه
وقمت قايله
يا رمسيس
يا رمسيس مالك كده واقف ؟
حاطت ايدك جنبك ليه؟
ميكرباصاتك مش طايقينك
قولي يا صخر بتعمل ايه؟
سادد حته فجنب الموقف؟
لامم جنبك كام اتوبيس؟
يا رمسيس
يا رمسيس انا عايزك تنطق
ليه الكوسة فشعبك منطق ؟
ليه الشعب وقف طوابير؟
علشان يهتف بالتغيير؟
أصلك واقف لقمة ف زورهم
لا بتتغير ولا بتغور
يا رمسيس يابو قلب حجارة
ناقصلك خوزة وصفارة
علشان تبقى شرطي مرور
ولا اقولك
ناقصلك بدلة وجرفتة
علشان تبق سعادة البيه
دايما ظالم يا فرعون
الظلم بتاعك ميت لون
هات المحفظة والتليفون
هات المحفظة والتليفون