كلمتين لمصر ______________ كل عين تعشق حليوة وإنتي حلوه ف كل عين يا حبيبتي قلبي عاشق واسمحي لي بكلمتين كلمتين يا مصر يمكن هما آخر كلمتين حد ضامن يمشي آمن أو مآمن يمشي فين ؟ ______________ شابه يا أم الشعر ليلي والعيون بحرين أماني والخدود عسل ونار واللوايي فى إبتسامتك يحكوا أسرار المحار يا للي ساكنه القصر عالي إمتى يهنا لي المزار كلميني يا صبيه طال على الانتظار ______________ كلمتين يا مصر يمكن حد ضامن يمشي آمن أو مآمن يمشي فين ______________ قصرك المسحور غيلانه بعد مص الغصن لاخضر ينحتوا عضم العيدان وإللى خلا الارض خضرا وإللى خلا الدار أمان عاش بجوعه ملو جوفه مات بخوفه م الغيلان روح الغلبان ما قالشي عن شقا العمر إللى كان ______________ كلمتين لمصر يبقوا حد ضامن يمشي آمن أو مآمن يمشي فين ______________ آدي كلمه من عذابي قلتها لك باقي كلمه من حنيني صنتها لك فى الضلوع من دنيا ظالمه كنت خايف يلمحوها يقتلوها ف سكه ضلمه شقشقت والنور بشاير زهرة الصبار يا سلمى يا نسيم الشوق يا طاير خد لمصر الصبح كلمه ______________ طول ما يبقي الركب ساير يبقي ضامن يمشي آمن يبقي شايف يمشي فين
أحمد فؤاد نجم // معتقل شبين القناطر / 1973