مش مرتاحة لي
(من يوميات زوج محاصَر)
تاني غيرة؟
يعني مش فارق أحَوّل حصتي في الشوق مدارس
منها تتعلم ليالي الصيف ملامحك
والشتا يجدل لي من حسنك ضفيرة؟
يعني مش فارق بإن الرمل لو مدد
على حِجْر الطريق..
والطير على كتاف السما
ولاّ القناديل اللي سارحة من جيوب الموج بتسعى
يشهدوا ان انتِ الأميرة؟
تاني غيرة؟
دا الـ هَنا راكب بساط الريح
بيقْطَع في الحكايات المسافة
كان مالوش غير غنوتي اللي بتوصفك للفرح سيرة
حتى دقّات الساعات اتكلمت عنك وقالت
يعني إيه الأولى انتِ والأخيرة..
مش عمايل..
صعب من كلمة تسيبيني بالساعات
مجروح بظنّك..
يخسرك إحساسي يتبعتر ومن جوّاه كياني
يتحرم من طلتك جُوّايا من كُتر انعزاله يعيش كده
حَمّال عُقَد..
يعمل ايه؟
أصله متعود يقَسّم وقته تقسيمة تجَلّي..
ساعة يتبخر فيصبح جوا تفكيرك سحابة..
لو تمطر..
تسقي وردة من اشتياق الروح فتِكْبَر..
تتقطف أول لقانا وعطرها الفَوّاح في ثانية
يتكتب ع الروح كتابة..
ساعة يتشبع من العطف اللي بيصحّيه شروقك
فيّ، أتصدّق بألوان الفراش الجي من بابك
على قلوبك الغلابة..
عدّا من صوتك وجالي..
كل ده وبتسيبي أفكارك تبات مش مرتاحة لي؟
كل ده ويتعلم الحاكم بأمر الشك قلبك
يبني منفايا اللي من جُواه سجنّي
وخلاّ جدرانه الليالي؟
طب ولو غيرتك دليل الحب معنى الشك إيه
لو طل من عينك قبالي؟
قولي معنى الشك إيه..
لو طل.. من عينك.. قبالي؟