/
/
/
/
سنين الضعف مسِّتها سنين الخوف
تحركها لتتحول سنين قوة على الظالم
وقطرة ري للمظلوم وللمهضوم
فتدارى وشوش كانت علينا سباع
وتتقدم وشوش تانية ولكن لسة فيها رتوش
سنين الهم يا همي يغور الذل مهما انطال
وتظهر تحت رجلينا خطاوينا ويتغير مدى الترحال
ولكن هل في زحمتنا وزنقتنا هيظهر للغلابة رجال
ومن صحرة بلاوينا هيجي زي نسمة صيف
انا طول عمري بتنشق وبتشوق وباحلم مهما طال اليل
وعارف اني هاقدرهم وهاكسرهم ولو يسقوني ويل الويل
أصلي اصيل ولو حملي يهد الحيل
دلو خنقو صلاح واحد هيطلع ميت صلاح الدين
هيحمي بيتي ويحمِّي ف رقابهم سيف
ومهما داسو فحمايا وخنقو الحلم جوايا
هاعيش أحلم بحلم جميل وفين متروح
أروح اجري بكامل قوتي وضعفي
وراك يا حلم احلامي ولو حتى أكون مدبوح
د اصلي عفيف و بيتي شريف ولا ارضى الهون
واغمس لقمتي الحلوة دِ من شربة عرق نازلة
ولا أطاطيش لكل جبان وكل خروف
دا مهما يعملو فيا أنا هفضل أسد غابتي
وهُمَّا وحوش زمان مقلوب ودق كفوف
ده حلمي شجره جوايا
فروعها من عروق قلبي
تمص الدم وتضلل شقى الملهوف
وأبقى الأَرض وترابها
أزيل الظلم من بابها
ولو شنقوني ف اعتابها
هاقوم أحلم واعيد الحلم من تاني
لحد م اخط عنواني
ويطلع جيل بطل ما يهاب سجون الخوف
يحرر كل أوطاني يحقق كل احلامي
وألقى الحلم قدامي
بيتحرك وبيحرك مئات والوف
يزيل الشر والأشرار
ويعبد ربه ليل ونهار
فتيجي خلافة الوحدة وينشر حقه في العالم
يسالم كل من سالم
وأعداؤه يجاهدهم يرجَّع أُمتي وأرضي
وتبقى خضار و تبقى عمار
ولا نعيشِّي سنين الخوف
/
/
/
كانت مداخلة على حبيبي د سمير العمري
واحببت ان تقرأوها منفردة بعيد عن العملاق الكبير
وهي من ثراء احساسه فينا
جزاه الله عنا كل خير
دمتم مبدعين
رد مع اقتباس
المشاركة الأصلية كتبت بواسطة الطنطاوي الحسيني
