مش ذنبي إنّي يدوب ولد بيحبها
رافض أكون حبة تراب فوق أرضها
متبعترين .. متنتورين
حبّه فـِ طولها
وحبّه تانيه فـ عرضها
مش ذنبي إني بحبها
وعشان كدا هكتب لها
واوصف لها
كل الحقيقه فـ كلمتين
وهقولها مين ابنها
أصلي ابنها
رافض أطاطي فـ يوم جبين
أصلي ابنها .. من أرضها
عايش فـ وسط المطحونين
اللي الهموم ليهم فطار
والغدا جرعة مرار
والعشى مش بيلاقوه
اكمنّهم مـ الغلبانين
مش راح امدح يا وطن
بعد اما خدت الحلم منّي
ولسا مدتش التمن
مش ههادي بعقد لولي
ولّا هندم فوق طلولي
ولّا هلعن فـ الزمن
هلعن ترابك
لما سبته للغريب
والعن مديحك
مش هقولك يا حبيب
وانت اللي جايب نعش ليا
وقبلُه جايبلي الكفن
حتى يوم ما بقول يا شعري
بلقى شعري
لسا مليان بالشجن
يا وطن !!!!
سهل جدا إنّي أمدح
الكلام مش مشكله
والقصايد لعبه سهله
مش معادله ومعضله
بس لمّا امدح واداري
غصب عني لما بكتب
ببقى حاسس ليه بصوره
فـي القصايد مخجله ؟؟
عارف ليه ؟؟
عشان الحب يا وطني
مهش غنوه وكام موّال
ولا سطرين على ورقه
ولاهو خطاب عشان يتقال
د رمله واحده من أرضك
مَ تتاقل ولو بالمال
وبعت الرمله والطينه
وبعت الكيله والكيال !!
فقلت الحال هيتبدّل
ولسا الحال د هوا الحال
خلاص يا وطني انا هسكت
معادشي فيّا حيل لجْدال
مدام الآيه معكوسه
وشمّامك كما الكوسه
فهنساك وانت تنساني
لا انا أحمد ولا موسى
ولو عايز أمدّح فيك
هتلقى كلامي بسبوسه
لكن بسكت ولما اسكت
بلاقي سكوتي يتكلم
عشان م الجرح بتألم
عشان انا كل أحلامي
فـ وسط الزحمه مهروسه
يا وطن
يا وطن ريحني لو بتحبني
ياوطن ببني فـِ حلمك
وانت ليه بتهدّني ؟؟
يا وطن عايز ترابك
يبقى ماس
يا وطن راضي أكونلك
لو مداس
بسّ حسّ بحالنا مرّه
ليه شبابنا يضيعوا برّه ؟؟
واحنى خيرنا كتير ويامه
ألف ميت مليون ندامه
إللي جايّ نقوله إرجع
واللي رايح بالسلامه !!
يبقى إيه معنى الوطن ؟؟
يعني الشجن ؟؟
ولّا السكن ؟؟
ولّا حته مننا ؟؟
ولّا اللي قال كلمة وطن
"واكل حلاوه بعقلنا" ؟؟
إحنا ليه نحب الوطن !!
كان الوطن بيحبنا ؟؟
د اديناه م الحب يامه
مدناش غير زلّنا
ليه بنوفي للوطن
واحنا الوطن بيخمّنا ؟؟
واحنا الحزانا من سنين
عالم غريبه فـ أرضنا
ليه رِضينا نعيش غلابه
وحقنا تاكله الديابه
ألف ليه وليه فـ قلبي
بس مش لاقي الإجابه
يا وطن ريحني جاوب
ع السؤال
بكره حالك ينعدل ؟؟
ولّا مش ناوي انعدال
هقول شعري لمين تاني
وانا شعري هزال فـِ هزال ؟؟
أدام مش لاقي مين يسمع
ولا يعقِل
وانا أصلاً منش قوّال
فريحني انت يا وطني
وقولّي إجابه للي اتقال
وشكل إجابتك الجايه
هتبقى سؤال
فجاوب بردو يا وطني
وحطّ نهايه للموّال
أنا تعب الكلام منّي
وغاب عنّي
مفيّاش قدره يا وطني
مفيش احتمال
فيتجاوب
يـ هيجاوب
أكيد شاعر
همومه جبال
فجاوب يا وطن غالي
يا ابن الحلال
وخلّي الفرح يتمكن
من الموال
الشاعر / أحمد موسى
ارتجال في
22/7/2009