صديد
..
.
الفرح تايه والألم
عمّال يزيد
والحزن عشش ف الحشا
جوه الوريد
والمُر سرسب بالنقط
يكتب نشيد
سمِّم عروق الفرح مات
والسندباد
أصبح غريق بحر الدموع
مع كل عيد
حلم الورود
مصلوب في حضنك يالربيع
حتى الندى وقت السحر
ميّت شهيد
بحرك غريق
والشط مش باين مداه
حلمك كابوس
والليل عبوس
تمسك فانوس
وتروح تدوّر ع النهار
تلقى النهار في العتمه تاه
الشط مش باين مداه
واما اختفى طوق النجاه
نزفت عيون عمرك
صديد
قوم انتفض
ما تسيبش عمرك ينسحل
تحت الجليد
لو صدرك العريان ضعف
إضرب جبال التلج بالكف الحديد
وان يوم يزورك إنكسار
إكتب على خد النهار
آخر سؤال
ليه كل يوم الحزن يكتب
فوق جبين الشوق نشيد
ليه بلقى زهرة دنيتي
طارحه الشجن من لون جديد
والقى الأماني اتيتِّمت
والفرح دبلت زهرته
جوه الوريد
ليه ألف ليه جوايا ساكنه
والجواب سافر بعيد
واقلب كتاب العمر
في الهامش تشوف
انّ الحقيقه الواضحه من عمر التاريخ
مكتوب لحلمك يتوِأِد
وان يوم يفكر ينتفِض
بيموت شهيد
...........
شعر / أحمد سعيد موسى