احنا مين ؟
وانتو مين ؟
الثورة ملك المظلومين
ملك الغلابه
واليتامه
واللي ماتو عطشانين
ملك اللي أكلوا م الزباله
واللي مالقوش حتى باله
واللي عاشوا مسجونين
حق خالد
حق مينا
واللي غرقوا ف السفينه
واللي ماتوا بين ادينا
واللي لسه مولدين
حق اطفال الشوارع
واللي صرخوا م المواجع
والمزارع والمصانع
واحنا صوت للمجروحين
الثورة مش ملك إل جماعه
أو لحركه
أو لحزب
وان حد قال الثورة ملكه
يبقى كذب
بس حقه
انه يقول ان احنا ثورنا
وانى ثاير
وان مصر بلدنا احنا
مش لزاير
مش لحبة ناس تكُلنا
وان سألنا عن حقوقنا
نترمى جوه الزباله
احنا مش حبة حساله
ولا كنا عاله
احنا مصر
ومصر إحنا
بين عنينا
وجوه روحنا
مهما سرقوا
مهما نهبوا
حتى لو كترة جروحنا