أبو قير
أبو قير وراك..جنبك.. قصادك..
في حسابه هربان مـ العدالة ومش هيرحم زَلّتك
لو مرة صادك
فاحترس..
صَبّاغ وبيوَزّع عمى الألوان على نُص الكلام في العهد
تتحول على إيديه الأمانة الجية من إيدك
غنيمة!
هتصَدّق اللون المزهزه؟ يبقى دوق..
الصدمة هتحَمّض في أفلام الوعود
وتشوفها لحظة وتنوي ترتيب الحساب الجي
وبرغم الحذر.. ترجع لنفس العادة ريمة.
ضحاياه يا مؤمن ملفوفين
متعلقين في ميدالية ما بتِلْمَعْش
طَفّاها الطمع في عيون لئيمة.
صَبّاغ وما اتعلمش يوم من مهنته
إلا استلام الشعلقة فـ حبل الكلام ويقَبّضَك
للكلمة مِيت معنى..
داير بألوان المصالح يسحِرك
ولكل لون.. لعنة!
وعجيبة لو صار الأمان خنجر
بيتسنن بنوم المخدوعين
يكتب على حيطان المآسي مذكّرات طعنة.
يقراها مِن جاله الكلام ع الجرح
ويراجع صور متلزقة من جوا كشكول الدسايس.
دا لأنه كان مؤمن بإنه من الحذر
قبل امّا بيصدّق يقايس.
جواك تقول: هيصدق ايه؟
إغراء بيتمسكن عليه ويقول له هات
راسك أدوسها وبعد ما يلبي الندا
يلقاها فـ جحور العَمَى
رادم عليها بصنعة النكران ودايس؟
***
حاسب هناك..
أبو قير وراك.. جنبك.. قصادك..
في حسابه هربان م العدالة ومش هيرحم زلّتك
لو مرة صادك
فاحترس..
إوعاك تكون تحصيل وحاصل للّئيم
إوعاك تسايس
3/12/2010