عدِّي الأمل!
/
/
عدِّي الآمل ياليل
ومترعبوش في الجُحْر
دامهما طال الليل
هيقص ديلو الفجر
عدي الأمل وبلاش
تستعدي ناس مساكين
ملهمش قوة عليك
غير رُكن ربْ مَكين
عدِّي الأمل مرات
متسدهاش بصْوَان
دا النيل أبو البركات
هيهدِّلك جُدْران
إنتَ سوادك مدّْ
واشتد بعد ما شدّْ
لكن بشارةِ النُّور
راح تقتلك وتْمِد
فاكر رُكُوبْتَك خيل
لكن عليك بِتْخِيل
وَقتِ الشدايد صعب
هتشوف معاه الويل
عدِّي الآمل بالِّلين
ومتزنقوش في الزُّق
سواد عمايلك جبل
وِأملنا سيل بيشق
عدِّيه ومَتْوَقَّفْشْ
هتورِّث الحسرة
مش جنِّتك يا ليل
دي نارك الحمرة
جُوَّه الأمل بركان
راقدلك إوعاله
راح يصهرك ألوان
برجالُه وجمالُه
مين غرَّرَكْ بالأمل
يعني عشان في القلب
كلِّ الحقايق أمل
كات ساكنَة جُوه بحب
عدِّي الأمل دي جُيوش
ونْفُوسْ تَقَاوي الويل
والرُّعبْ من قِرْبِتَكْ
رَاحْ يِرْعِبَكْ يَا ليل
/
ويا ليل وعجبي
تحياتي ودمتم مبدعين