في خريف العمر جاني
طيفك الغالي وناداني
وابتسملي ...
صحَّى فيا الحلم تاني
رجعه لكل الأماني
وابتدا عمري الجديد
يحتضن من تاني إحساسي السعيد
كان يا ريت قلبك مكاني
لو رضي عني زماني ...
لو يقدَّر

تعرفي يا كل أيامي وهنايا
أد إيه كنت انتظر لحظة لقايا
أد إيه دوب في قلبي الحنين
أمسح الدمعة إللي في عيون السنين
لما كان القلب يرسم ليا صورتك طيف معطر
ترتعش وياه في روحي لهفة الحلم إللي صور
أشتكي منك وليكي
وأرهن العمر في إيديكي
زرع أخضر

يا حبيبة عمري قبل ما تشوفك عينيا
والنصيب إللي اتكتب من يومه ليا
اتكتب في القلب لوعة
نار تطفيها عيوني بألف دمعة
كان ياريت الفجر شقشق والتقى فينا الدليل
كان ياريت نقدر نعدي المستحيل
كان يا ريت الزرعة تكبر

والنهاردة كل واحد له طريق
كل واحد فينا في الأحزان غريق
بسمته فوق الشفايف باهتة والتكرار ماليها
والعيون النظرة منها تايهة فيها
هيَّ حال الدنيا بتفرق وتجمع
والقلوب هي اللي بتراضي وبتمنع
والتمن عمر وحياة
تبقى منها الذكريات
والقدر هو اللي يقدر