ولسة في رحلة الأيام غريب وإنتا بين أهلك
ولسة الصبر يا أيوب على صبرك بيندهلك
ولسة الدنيا ترسم خطوتك فيها
وتمشيها
كما الريشة في مهب الريح
وتتطوح
وكاسك خمرها قهوة وشاي وشيح
وحيرتك تشتكي منها بلاويها
ما بين ممنوع وبين مسموح
وعين الحزن بتداري

لإمتى تتعب الفكرة وتنسى بعدها المطلوب
وليه الخوف من بكرة ومن المكتوب
مليت الحرف من وجدك ولا تكلمت
تناجي الليل من همك كما المغلوب
وده دمعك على خدك مداد الروح
بيكتب ألف سطر وسطر من غير بوح
ويصرخ في المدى صمتك
ويضحك قلبك المدبوح
وإنتا في الجموع ساري

كرامتك هي تاجك ترفعك عالي
فصون نفسك ولو كان التمن غالي
كرامتك هي في دفاعك عن الأوطان
كرامتك هي عز الذل للديان
كرامتك هي في صدقك مع الإنسان
تحبو بجد لا تهينو ولا تنهان
ده لو جاع الأسد بيموت ولا يطاطي
ولا يقبلشي لقمة ذل من واطي
ويفضل سيد الغابة
ولو حكمت بخسة دولته ديابة
ما هي الموتة عليك وحدة
وعمرك في القدر جاري