الحكايـة
رواية : أحمد يسـرى


ملك الغابة
نده النمر
قالَّه يا نمر:
الوضع خطير
ولابد من بحث الأمر
المرة دى مش ح تمر
الغابة كلها غضبانه
ومفيش حيوان مبيشكيش
إن انت دوقَّته المر
ملك الغابة..
قالَّه يا نمر.. أنت سامعنى
أبقي قاطعني
لو ليك رد
ليه كل ما بتشوف القرد
وكأن ما بينه وبينك حرب
تنزل فيه.. سب وضرب
وتقول للقرد..
"خلقة أهلك مش عجبانى"



خليك ناصح..
أنت يا نمر لسه شباب
دوَّر دايماً على أسباب
علشان تضرب بيها القرد
مثلاً يعنى..
قولَّه فى مرَّة
اطلع حالأ فوق النخلة
واطلب منُّه كام بلحاية
لو جابهم حمر
قولَّه ان انت عايزهم سود
لوجابهم سود
قولَّه ان انت عايزهم حمر
ماشى يا نمر
قالَّه تمام
كلنـا طاعـة
ملك الغابة أوامره مطاعة
فجأة شاف القرد قصاده
أيده بتاكله..
قرفان من شكله..
محتار بين رغبته ومشاكله


قالَّه يا قرد
إطلع فوق النخلة بسرعة
أنا عاوز منها بلحتين
بص القرد
وف الحال رد
قالَّه يا نمر..
عاوزهم سود..
ولا عاوزهم إتنين حمر
صرخ النمر وقال من تانى
بصراحة يعنى..
"خلقة أهلك مش عجبانى"

ابن الجنوب
أحمد يسرى