سجّل يَ ميدان التحرير .. شعر عامي
.
سجّلْ يَ ميدان الحرير ... شعر عامي
..
سجّلْ يّ مْيدانِ التّحريرْ
إسمِ بلدنا واسمِ وْلدنا
في كتابِ الحرّيه وغنّي
غنوه لبكره وللتّغييرْ
علّي الرايه
وقول ويّايا
مصرِ يا أمّ الدنيا وأمي
فْداكي ولادي
ومالي ودمّي
يلا يا عمّي
كفايه مذلّه
قولوا يا ربّ
وربّنا عالمْ
هوّ خلقنا وهوّ نصيرْ
سجّلْ يَ مْيدان التّحريرْ
كنّا في عزّ النّومْ
وصحينا
ده اللي بايعنا
وده اللي شَرينا
وده اللي فْ نارِ الغربه
ناسينا
واستنينا سنين
ولقينا
إنْ الظلمه سببها إيدينا
والفجريّه اللي اتمنينا
دخلت قبل شويه علينا
فوق حصان النّور الدافي
بالتهليله وبالتكبيرْ
يا ولاد الشّموسه
حَترجعْ تضحكْ تاني
وانتو الشعله
وصوت الشارعْ
انتو العاملْ وانتو العالمْ
والبستاني
بمحبتنا وبوحدتنا
وبإصررنا عمرهُ بحاله
حّ يبقى ثواني
يلا نهدّ قبور الماضي
وفوقا الغيمه الحلوه نطيرْ
مصرِ يا غاليه
ونيلك غالي
وهرمك زي جبينك عالي
وانتي الأمّه وانتي اللّمه
وحضنك لازم يوم يجمعنا
في المحروسه
وبكرة الزّفه وانتي عروسه
وعرسانك شهدا التحريرْ
.
بقلم : رفعت زيتون
القدس \ القاهرة
يوم سقوط الطاغية 11\2\2011.
.
رد مع اقتباس
المشاركة الأصلية كتبت بواسطة نادية بوغرارة
