نوم السَّدَاح والكسل ** لو مهما زاد حده
ما طلِعش هو المرض ** كان العَرَض وَحده
النسر فوق العلم
ردد ورانا القسم
حالفين نخلّي الهرم
يطرح هرم قده
قلنا النهار له عينين
حبسِت بُكاها سنين
تملا الدموع زنازين
سجّانها باع أرضه
كام ألف ألف بريء
حَسّوا البيوت صناديق
على ذمة التلفيق
سمعوا النِّدا.. ردّوا
لا تقوللي حُكم القوي
ولا باشا مين فهلوي
لا دراع شَريف يتلوي
ولا كان مداس.. خَدّه
طبْل وعِنَب.. شخاليل
مستحضرات تضليل
مش هُمّا دول الجيل
ولا حتى جيل بَعده
ما طلعش هو المَرَض
كان العَرَض وَحده