العَروسَة عَاوزَة مِينْ ؟
يا ترى الدنيا وخدانا في أي اتجاه ؟
الله أعلم بينا بكره .. و إيه هيحصل في الحياة
الكل مستني .. مين هييجي
و مين هيرمي للبلد طوق النجاة
بس إللي شايفُهْ صورة مهزوزة لعريس
والعروسة إللي معاه !!!
.................................................. ...
يا تري مصر العروسة
بكره يبقي عريسها مين ؟
البوصلة ماشية فوق وتحت .. شمال يمين
كلنا بنقول ... مين رئيسنا ؟
ومين هيحكم ؟ ... و مين ... و مين ؟
ألف حاجة جوه راسنا
و ألف ألف سؤال بيجروا ... حيرانين
كل يوم ... ماسورة طافحة مرشحين
................................................
كل واحد شاف في نفسه أجدع رئيس
ولسه يا ما نشوف ونسمع ...
وَحِدُوه ... يا موحدين
مصر دلوقتي عروسة
ألف واحد جاي بيخطب
شاف في نفسه عريس متين
شاف كمان إنه أجدع ألف مرة . إنها عشقاه سنين
وإنها .. إن كانت بهية ... هو بس .. بميت ياسين
.................................................. .............
بس مصر من بعيد .... واقفة بتضحك ..!!!
تقول يا ناس ... بالذمة قولوا ... عريسي فين ؟
كل إللي شيفاهم عجايز .. إما عدوا سن الجواز
و للا لسه فرز تاني ... صغيرين
و للا غاويين بس يجروا .. وسط زفة
وسط هُليله .. و لَمه .. كلهم مش معزومين
.................................................. .........
ميت خسارة .... كل يوم عريس جديد
كإنى بس طالبة الجواز
وللا بيعة في المزاد . وللا في أسواق العبيد
أنا مش عاوزة العريس .. أي عريس
زي إللي قبله ... قلبه ميت أو عنيد
أو يكون واحد غبي عمره ما يبص لبعيد
أو يكون واحد أناني ... بير فساد
كل فكره .. إزاي يفيد .. ويستفيد
أو يكون عنده عيال .. هَمْهُ إمتي يورثوه
طول حياته ما يشبعوش .. كل يوم هل من مزيد
.................................................. ............
نفسي يجى عريس حقيقي .. قلبه جامد .. عنده عقل
عنده صدق .. عنده حكمة .. عنده تقوى .. عنده دين
فيه مروءة .. فيه أمانة .. فيه كرامة .. فيه حنين
يحب بلده .. يعشق ترابها ... يحب ناسها الطيبين
مش يجيلي واحد وبس .. يحب نفسه
غاوي سُلطة ... غاوي زفة كدابين
نفسي واحد .. فيه شهامة .. فيه رجولة
واد شباب معجون بطين
أرض مصر حته مِنه ..
حتى مَية نيلها أشوفها .. نقطة عرق فوق الجبين
.................................................. ...........
نفسي واحد قلبه أسد .. واد شجاع
فيه جراءة .. و ييا حِكْمَة مطلوبين
يوزِن أموره من غير تهور أو سذاجة أو عباطة
يِوَدِي بلده في داهية سُودة .. في ثانيتين
عايزة واحد .. كله عقل .. كله عدل .. قلبه عدل
خطوته .. حق .. وعدل
يجي ويسَمِي .. يجي و معاه النصر المبين
دي شروطي .. دي مطالبي ..
إللي شايف نفسه فيهم .. يرمي بياضُه
الشعب يحكم .. والدنيا تحكم كلها
بس قولوا .. هو فين ؟!! .. هو فين ؟!!
شعر : د هاني ابوالفتوح
الكويت – الجمعه 1 ابريل 2011