آخر من يعلم
عزيزي المواطن..
ما تسألش نفسك.. لو القشية معدن
ولكن صفيح..
وماتقولش مين اللي مسؤول قصادنا
يراجع بلدنا بموقف صريح
ما تسألش مين اللي حط البراءة
في إيد اللي ساهم في عبارة تغرق
ولا مين بيسرق
ويرميك فريسة لكلب المجاعة
وتتساب لحد اما ريحتك تفوح
ماتسألش مين اللي خلانا نشحت رغيف المعونة
وحارم أبونا من الطين/يجَرّف
وزوَّر رموزنا. وبعتر نفوذنا
ويخرج علينا في عيد انتصارنا خطابه الفصيح
ما تسألش مين اللي رافع في حاجب..
ولا حد عاجب..
في أصعب ما تحمى علينا المصايب
لو الحرص واجب.. ما بيحلهوش
ومين اللي حول سلاح أمن دولة لشلة مراقبة
وحَلَّق وحوش..
ويطلع علينا النهار من بداية ماكنا اتولدنا
مع الشمس والملك لله صَبَحْنا
على نظام مكمل طريق المزايدة
بنفس الوشوش..
ومين اللي هَرَّب..
ومين اللي كهرب..
ومين اللي عذّب... ومين السبب.
ومين اللي علاّ في ضغط المعيشة
ورَكّب في كل المسافات ما بينّا مشاعر خشب.
ما تسألش نفسك وتطلب
لحُمّى الموارد إغاثة..
ولا تقول دا واجب على اللي استباح الإقامة
معزز في قصر الرئاسة..
هيتقال: ماشافش!
وإن المصادر بتِوصِف له إن البلد وردشان!
ومعزول ساعات النهار ويّا ليله
بيحمي الحدود اللي بينا وبين الأعاجم حاميها
من الأكلان!
كأن اللي برة ماعندوش مُواطن
ولا سِعر عملة.. ولا دخل قومي
فقاعد فاضي له
بيطلب مشورته في حق الجيران
كأن اللي برة على الكُشك قاعد
فيدي له رنة
فراح لك قوام شد كرسي الرئاسة
على حدود بلدهم وقال:
آدي قعدة..
وفي نهاية السهرة قام مد إيده
في جيب بنطلونه وطَلّع مساعدة
وقال دُول لمصر!
وده بحسن نية..
لا تحسب بإنه اشتراك انت وابنك
بدي المديونية..
ولا إنه عَدّل مناهج عقولنا
ودَرّب فريق الوزارة ونَشِّن
علينا بحرارة.. وتعليم/حضارة
نجاح أو هوية
خلاص كله يطلع.. في زيت القلِيّة
مع العصبجية.. صباح البيان اللي حط اللجام
وقال السلام السلام السلام
2/2/2011