أحدث المشاركات

مصير الكوكب على متن الشراع الشمسي» بقلم إبراهيم أمين مؤمن مصطفى ح » آخر مشاركة: ناديه محمد الجابي »»»»» قراءة فى بحث تجربة ميلغرام: التجربة التي صدمت العالم» بقلم اسلام رضا » آخر مشاركة: اسلام رضا »»»»» وذُلّت الأعناق مقتطف من رواية قنابل الثقوب السوداء...» بقلم إبراهيم أمين مؤمن مصطفى ح » آخر مشاركة: إبراهيم أمين مؤمن مصطفى ح »»»»» الفصل الثاني من رواية وتستمر الحياة بين يأس و تفاؤل الأم الجريحة» بقلم بوشعيب محمد » آخر مشاركة: ناديه محمد الجابي »»»»» و تستمر الحياة بين يأس و تفاؤل الفصل الأول من الرواية بقلم بوشعيب» بقلم بوشعيب محمد » آخر مشاركة: ناديه محمد الجابي »»»»» قراءة في بحث أمور قد لا تعرفها عن مستعمرة "إيلون موسك" المستقبلية» بقلم اسلام رضا » آخر مشاركة: اسلام رضا »»»»» نعم القائد» بقلم عطية حسين » آخر مشاركة: احمد المعطي »»»»» قراءة في مقال يأجوج و مأجوج ... و حرب العوالم» بقلم اسلام رضا » آخر مشاركة: بوشعيب محمد »»»»» الطفل المشاكس بقلمي» بقلم بوشعيب محمد » آخر مشاركة: بوشعيب محمد »»»»» @ تَعَاويــذ فراشَــةٍ عَاشِقـَـة @» بقلم دوريس سمعان » آخر مشاركة: دوريس سمعان »»»»»

صفحة 3 من 7 الأولىالأولى 1234567 الأخيرةالأخيرة
النتائج 21 إلى 30 من 68

الموضوع: صفحات الأديب و الشاعر الشربيني خطاب رحمه الله تعالى .

  1. #21
    الصورة الرمزية نادية بوغرارة شاعرة
    تاريخ التسجيل : Nov 2006
    المشاركات : 20,306
    المواضيع : 329
    الردود : 20306
    المعدل اليومي : 3.21

    افتراضي

    اقتباس المشاركة الأصلية كتبت بواسطة الشربينى خطاب مشاهدة المشاركة

    عيد ميلادي

    في يوم ميلادي
    تبقوا تجيبوا لي
    عروسة قشطة
    صغيَّرة
    ضحكتها
    ميه مقطره
    بنت أصل
    و مأصله
    تسقيني
    حب وغندره
    ****
    و تجيبوا تورته
    متزوقه
    طعمه وحلوة
    ومسكَّره
    وتكون كبيرة
    ومدُّورة
    من غير شموع
    منُّوره
    بعدد سنيني
    اللي ورا
    ****
    العمر عدي
    كم سنه
    سنين كتير
    شعر وغنا
    وسنين عذاب
    ويَّا ضنا
    لكن لحظات الهنا
    دول بالمقاس
    والمسطرة
    أكونش غلطان
    في العدد
    ولاَّ شهوري
    صغيَّرة؟
    http://www.rabitat-alwaha.net/moltaqa/showthread.php?t=57594

  2. #22
    الصورة الرمزية نادية بوغرارة شاعرة
    تاريخ التسجيل : Nov 2006
    المشاركات : 20,306
    المواضيع : 329
    الردود : 20306
    المعدل اليومي : 3.21

    افتراضي

    اقتباس المشاركة الأصلية كتبت بواسطة الشربينى خطاب مشاهدة المشاركة

    دستورالدساتير

    سبب فساد الغابة
    دستور شريعة الغاب
    فرضاه ملوك الديابة
    يالبطش والإرهاب
    قطعان وعايشه غلابة
    هايبه قطع الرِّقَاب
    والحل إيه ياجماعة
    لوتعرفوا الأسباب
    منكم ناخد مشورة
    واللِّي استشار
    ما خاب
    ****
    رأي ونال الموافقة
    قاله الحكيم أبو ناب
    نعمل نظام ودولة
    ومؤئسسة واحزاب
    تحكمنا سلطة ذاتية
    مش وحش م الاغراب
    تبقي الأمور متداولة
    بمجلس عموم نواب
    خدوا م البشر عبرة
    وعيشوا بقي احباب
    نقل الخبر والبشري
    هدهد ومعاه غراب
    ****
    قال الحكيم واتوصي
    نعمل حكومة أونطا
    وزارة من غير سلطة
    تعمل إدارة وخطه
    لعبة وتلات ورقات
    ****
    ونجيب لها وزرا
    كم فار مكار و قطة
    وأرنب عنده زغطه
    بيمشي كما الخواجات
    ****
    ولكل وزير أورطة
    ومكتب كبير ويافطه
    وكيس كبيرو شنطه
    يلموا فيها الإتوات
    وكرسي حديد بدور
    وفاكس و تليفونات
    ****
    ونكلِّفها بمهمه
    تشرف بصفة عامة
    علي إنتحاب الأمة
    وتحل الإشكلات
    *****
    تحضر آخر جلسة
    في البرلمان خلسة
    تنخنس رزي عرسة
    وتوزع البركات
    *****
    لزقوا علي الأشجار
    منشور كبير وبيان
    اللي ماصادش فريسة
    من كام يوم وجعان
    فتحوا باب المنافسة
    علي مقعد الحيوان
    مشهور بكرسي العرسة
    أبو شمخة وهليمان
    ****
    هربت تعالب خايبة
    وقطيع من الخرفان
    وديابة مزعوره خايفه
    من اللي جري وكان
    عركة وها تبقي حاميَّه
    الفايز فيها خسران
    بين فار سنانه غارزة
    في ديل القط الجبان
    وقرد ضوافره كابشه
    فرعين من الأغصان
    مع أسد نيابه بارزة
    م اللّي جري غضبان
    ****
    زحفت حيَّة سامَّه
    مع ضفدعه وتعبان
    صحوُّا البهايم النايمة
    بصوت بغبغان غلبان
    شاعوا ف الغابة كذبة
    قال إيه حصلت زمان
    قرد ضحك علي لبوة
    راكبها كما الحصان
    وفار عربيد وسكري
    بيسرق أكل الجيران
    وأسد ظبطوه ف خلوة
    مع فاره كان سهران
    ****
    من نهش السيرة لحمة
    صاب القطيع هيجان
    طلبوا مناظره حرة
    في سهرة وتكون أمان
    علي ضوء قمر وخضرة
    يحكمها أبو قردان
    مسموح لكل عضو
    يشرح ويقول بيان
    ****
    قال الأسد بمناورة
    خد لك راجع وعيرة
    ساعة ما تيجي تختار
    دنا برضه ملك الغابة
    حامي العرين والغار
    سلطان ولي مهابة
    يا ما قالوا فينا أشعار
    وحنيِّن قوي ع الغلابة
    حتى أسألوا الحمار
    ****
    القرد خطب وقال
    طول عمرنا احباب
    ومهما عليت وكبرت
    أصلي عنكم ما غاب
    أنا جدي أصله غول
    رمز لعهود إرهاب
    وابويا نسناس عجوز
    ساكن في خص غاب
    بيسرح يلعب يوماتي
    من غير قميص ألعاب
    ****
    بنيت نفسي عصامي
    وسرقت عش الغراب
    لو وقفتي جنبي
    ونجحت في الإنتخاب
    أنا أطلع شجر عالي
    بسهولة من غير عذاب
    أجيب لكم جوز هند
    وموز وعيش وكباب
    ****
    وقف الفار المكار
    ف الخطبة قال أسرار
    فَتشْ عيوب الغابة
    وزوُّد في العيَّار
    قال إحنا قد الخلايق
    ملايين كتير ف جحار
    دا غير ملاين بتدرس
    في معامل الشطَّار
    ضمنين مكسبنا بكره
    وفوزنا ف الإختبار
    واللِّي ناوي يعادينا
    ها نلَّعب في عبه فار
    جدي ميكي الأمريكي
    وحش مرعب جبَّار
    ****
    ما تغروكوش القوة
    ماهو كل أسد فتوة
    ف عرينه كم لبوة حلوة
    لابد لهم في الدار
    ****
    والقرد ابو شقلباظ
    اهبل وعقله طار
    في ضهرة حته حمره
    عريانه لعيون اشرار
    إزاي نختاره قدوة
    يا ادي الفضيحة والعار
    دققوا وانتوا بتختاروا
    قبل ما تخدوا قرار!!

  3. #23
    الصورة الرمزية نادية بوغرارة شاعرة
    تاريخ التسجيل : Nov 2006
    المشاركات : 20,306
    المواضيع : 329
    الردود : 20306
    المعدل اليومي : 3.21

    افتراضي

    اقتباس المشاركة الأصلية كتبت بواسطة الشربينى خطاب مشاهدة المشاركة

    يا يا أبن الجزاراعمل حسابي
    أنا لي كوم ف المعجزة دي
    همَّا بيتين عشان ولادي
    وأعمل عزومه لناس صحابي
    أشرح تاريخ المسألة دي
    إزاي صلاح وحد جيوشنا وألأمم
    وإزاي نعيد أمجاد بلادي
    ****
    أنا هانتظر لمَّا القصيدة
    تبان عروقها و تنكشف
    حبة عقول خامله بليدة
    خلاياها ماتت م الأشف
    نضَّفْ يا شاعر كل الخلايا
    واكحت مرضنا اللِّي اتعرف
    ****
    جراح وشاطر مش جزار
    شق وفصل عرق الورمْ
    علَّم بمشرط فِّهمْ حمار
    حُكَّام كتير صابهم بجمْ
    غاية المني أموت أنا
    رافع هاماتي والعلم

  4. #24
    الصورة الرمزية نادية بوغرارة شاعرة
    تاريخ التسجيل : Nov 2006
    المشاركات : 20,306
    المواضيع : 329
    الردود : 20306
    المعدل اليومي : 3.21

    افتراضي

    اقتباس المشاركة الأصلية كتبت بواسطة الشربينى خطاب مشاهدة المشاركة

    لو كنت أعرف
    يا صاحبي
    إن برجك
    برضه حوت
    كنت فضلت
    في السما
    بعت عمري
    واشتريت لك
    مجرة كاملة
    إنما 00000
    خطفتني نجمة
    صغيرة
    خبتني جوه
    قلبها المسحور
    ففضلت أدور
    حواليها
    في الفضا
    ايام كتير
    وشهور
    ****
    أعمل إيه مسحور
    وده حكم القدر
    توهت يا صاحبي
    في مدار عنيها
    قول نسيت
    سكة رجوعي
    وبحاول دايماً
    افتكرْ
    بيتنا اللي كان
    جنب بيتكم
    من زمان
    قدامه زهرة
    و شجرة خضرة
    وفوقه
    ساكن القمر



  5. #25
    الصورة الرمزية نادية بوغرارة شاعرة
    تاريخ التسجيل : Nov 2006
    المشاركات : 20,306
    المواضيع : 329
    الردود : 20306
    المعدل اليومي : 3.21

    افتراضي

    اقتباس المشاركة الأصلية كتبت بواسطة الشربينى خطاب مشاهدة المشاركة

    رفات الأسري

    قوم بينا يا قاضي
    نعدي أنا وانت البر التاني
    نلم عضم ولادنا اللي بنادي
    يااااااااه
    مش دي جتة أبويا
    اللي فقدناه
    كان نفسي يعود
    معلِّم أنا ضحكته بسنته الدهب و اللولي
    وعضمه المحني والضلع اللي كان مكسور
    جنب حجابه الحاجز
    حلمه المشروع
    ملزوق في سقف بطنه
    من الخوف الجوع
    وأنا لسه يدوب مولود
    أنا فاكر لمَّا امي بعت له ف سينا جواب
    وقالت له يا أبو أحمد ما تحملش الهم
    اللي من صلبك
    ف غيابك ها عمل له حفله و سبوع
    *****
    وأنا ببدء تاتا و هحبي واخطي العتبة
    قالوا لي أبوك مفقود
    يمكن مات وشبع موت
    ف الغربة وأكله الدود
    أو نهشه الديب المفجوع
    وكلاب الصحرا السعرانه
    آه يا نا
    الرمل خبي حبابي عنيه
    طلعها شجره وضله تطرح لولاده اللي مشافهمش
    ثمرة لبكرة
    لما نعدي يا سعادة البية
    وندُّور علي أسرانا ف ألف طريق
    نرتاح تحت ضلتها من الحر
    ونرطب الجوف الحامي ونبَّلْ الريق
    ولمَّا أنا وانت نرسي علي بر
    نطفي في قلب امي نار الشوق
    ساعتها يا قاضي لمَّا هاتنبش ف الماضي
    أرتاح وترتاح أمي ف طربتها
    مدفونه معاها حصرتها
    ها تروق وتخف
    بحق وحقيق
    لمَّا ها تبدأ يا جناب القاضي
    في كتابة رأيك ف التحقيق
    هل أبويا جبان
    كان بيدافع عني
    ولاَّ باعني وخان
    وإن كان الهمجي مدان
    في البحر العاتي لص وقرصان
    بدمه البارد قتل الإنسان
    مين يا جناب القاضي
    ها يجيب حق الغلبان !!؟

  6. #26
    الصورة الرمزية نادية بوغرارة شاعرة
    تاريخ التسجيل : Nov 2006
    المشاركات : 20,306
    المواضيع : 329
    الردود : 20306
    المعدل اليومي : 3.21

    افتراضي

    اقتباس المشاركة الأصلية كتبت بواسطة الشربينى خطاب مشاهدة المشاركة

    صيد العصاري

    والله يا أمه
    ما غوِّيته
    هو اللِّي هواني
    كده لوحده 0!؟
    عصفور وشافني
    قصاد بيته
    غمز لي 00!!
    قام قلبي ارتاح له
    *****
    الضحكة بانت
    في عيوني
    زقزق وطار
    كده علي راحته
    رميت عليه
    سهم برمشي
    شغلت قلبه
    و جرحته
    غني ورفرف
    بجناحه
    بطرف عيني
    أنا لمحته
    ما همه تعبه
    ولا جروحه
    قال الحقيني
    وأنا لحقته
    ****
    مديت إيديا
    أخد إبده
    حضن كفوفي
    كده ف راحته
    و قال كلام
    هزْ مشاعري
    عجباني يا أمة
    قوي صارحته
    عاهدني قال :
    ها طلب إيدك
    وعدني يا أمه
    وأنا صدقته
    والله يا أمه
    ما زقيته
    هو اللِّي وقع
    كده لوحده !؟

  7. #27
    الصورة الرمزية نادية بوغرارة شاعرة
    تاريخ التسجيل : Nov 2006
    المشاركات : 20,306
    المواضيع : 329
    الردود : 20306
    المعدل اليومي : 3.21

    افتراضي

    اقتباس المشاركة الأصلية كتبت بواسطة الشربينى خطاب مشاهدة المشاركة

    شيَّال هموم
    يا نبيل يا بن مصيلحي
    اجمل مافيك حبك ليَّا
    يا رب يديم لي حبك
    يفضل يطير كده حواليَّا
    ****
    شيَّال من ضمن الشيالين
    وبشيل هموم ناس طيبين
    عايشين علي شمال الحياة
    ف الآخرة من أهل اليمين
    ****
    ع النده جاهز أشيل لهم
    بلوي ومصيبة جت عليهم
    لو سبتهم مش تبقي عيبة
    أمال مين غيري ها يدلهم
    أسند إيديهم ع الطريق
    علي كتفي واكتاف بعضهم
    ****
    لو سبتهم شوف كم غريق
    يغرقوا في بحر ملوش قرار
    والرحلة دايماً تحتاج ونس
    يلاقوه ساعة الألم و المرار
    أحن عليهم م الأخ الشقيق
    ****
    يا ريت يا صاحبي
    تساعدني
    وتشيل معايا بقلب سليم
    شفت اللي قبلك
    دخل يشيل م السوق
    حبة حمول
    أخوك أحمد أبو إبراهيم
    مع إن شايل ف قلبه
    حبة هموم
    رمي حموله علي ربه
    ودخل يشيل م السوق
    ولا همه تعب قلبه
    ما بين الناس الطيبين
    يروح همة
    من دعوي صالحة يا صاحبي
    يطيب و يروق

  8. #28
    الصورة الرمزية نادية بوغرارة شاعرة
    تاريخ التسجيل : Nov 2006
    المشاركات : 20,306
    المواضيع : 329
    الردود : 20306
    المعدل اليومي : 3.21

    افتراضي

    اقتباس المشاركة الأصلية كتبت بواسطة الشربينى خطاب مشاهدة المشاركة

    ورد الأمهات

    ورد الحنان يا أمه
    دبلان علي الرف
    حتي شجر الجناين
    والورد والحنَّة
    متدلدله أغصانه
    وعصفورة مراسيلي
    هي وعصافير الجنة
    شوقها لحنينك هف
    ****
    فغنت لحن حزين
    لمت كل الآهات
    دمعة ف نن العين
    و أنا و اليتامي والصبر
    في عيد الربيع والحب
    واقف علي مقامك
    ملايي كتيرة صف
    *****
    ما فضلش من ريحتك
    غير طبطبة من خالة
    من كل حين وحين
    حبة حنان وقواله
    نازل مع دفا القلب
    سيل دموع ودعا
    طالبه من ربها
    يغفر و يرحم أختها
    ويخلِّي الجنة مثواها
    ****
    تميل عليَّا بعطفها
    وتقول لي ياضنايا
    أحمد واشكر ربنا
    دايماً علي كل حالة
    أختي قبل الرحيل
    سابت وراها رجالة

  9. #29
    الصورة الرمزية نادية بوغرارة شاعرة
    تاريخ التسجيل : Nov 2006
    المشاركات : 20,306
    المواضيع : 329
    الردود : 20306
    المعدل اليومي : 3.21

    افتراضي

    اقتباس المشاركة الأصلية كتبت بواسطة الشربينى خطاب مشاهدة المشاركة

    مسابقة وجوايز

    موضه وطالعة
    إعلان لسلعة
    بايرة وبايظة
    أو حتى فاسدة
    ***
    نغري زبونها
    ببنت حلوة
    بيضة ولاَّسودة
    أو حتي كوده
    قايده المفاتن
    وتمللِّي والعة
    ****
    شوف البضاعة
    آخر حَمَار
    من بسْ لمسه
    تطلَّع شرار
    شعاع ونار
    م الخد طالعه
    ****
    خد لك صورة
    سته ف تسعة
    صورة بس إيه
    تكسب ياسيدي
    سُمْعه وشهرة
    وخضار سُوتيه
    تبيعه بكره
    بمليون جنيه
    بس البداية
    آخد غداي
    وحاجة للعيال
    خمسين جنيه
    دول مش كتير
    جرب يا بيه
    ****
    وأدي خبَّاز
    يخبز رغيف
    بقشْ وجاز
    ناشف وجامد
    زي القزاز
    ****
    قال من حلاوته
    و كمان طعامته
    لو تاكله حاف
    يجيلك زوغطه
    روحك ف ورطه
    لو ورك وزة
    أو حتى بطه
    وخضار بدمعة
    عليه شطة
    الحق منابك
    واقطع لقمة
    تيجي ودن قطه
    ****
    قادم وغمسْ
    حبة خُضار
    لمَّا قطعت
    حرف الرغيف
    لقيت فيه
    حاجه طريه
    بصله ناشفه
    و رجل لفار
    ****
    رحت اشتكيه
    لبتاع الصحة
    أتاريه تعبان
    داخل مصحة
    مهدود حيله
    وعنده كحة
    ****
    قال يا سيدي
    بصوت ضعيف
    عاملين مسابقة
    في ألف شنطه
    بحق وحقيقي
    وماهيش أونطه
    اللي هايجمع
    جته لفار
    ملهش ملة
    كبير صغير
    طويل قصير
    أو قد عجلة
    ندي له جايزة
    معزة وجاموسة
    وكمان حمار
    ****
    ابعت جوابك
    آخر النهار
    وفيه منابك
    صاحب المدار
    عامل مسابقة
    حرة ونزيهة
    ماهش قمار

  10. #30
    الصورة الرمزية نادية بوغرارة شاعرة
    تاريخ التسجيل : Nov 2006
    المشاركات : 20,306
    المواضيع : 329
    الردود : 20306
    المعدل اليومي : 3.21

    افتراضي

    اقتباس المشاركة الأصلية كتبت بواسطة الشربينى خطاب مشاهدة المشاركة

    سوق عكاظ

    وانا نايم علي السرير
    فتحت برموتي الجهاز
    هامت روحي ف الفضا
    ف الشام وغزةوالحجاز
    ف العراق الدم سايل
    ناس ضحايا بارود وغاز
    متقطعين جزلْ نساير
    معروضه ف يتارين إزاز
    لشيخ قبيلة م القبايل
    صاحب آبار ميَّة وجاز
    *****

    كم قناه بتبيع رسايل
    كل ليلة ف سوق عكاظ
    تستضيف يوماتي قاتل
    اللٍّي كادني أكيد وغاز
    المذيع أبو ضحكة صفرة
    اللِّي شايل ميت جواز
    داير يتاجر بالقضية
    ف شاشات ألفين محطة
    يسأل ويخدع ناس عزاز
    ليه قتلت حلم البلاد
    إرجوك تجاوب بإيجاز
    *****

    زي ما تكون تمثلية
    يرد ضيفه بدم بارد
    دول جماعة إرهابية
    ف قلوبهم صهد شارد
    ونور معادي للساميَّة
    ومن خوفه شافه مارد
    محتاج لعصبة عسكرية
    قمنا أعلنا بصارحة
    دي مصيبة إنسانية
    واللِّي لينا جي يساعد
    له معونة وكم هدية
    قمت أشارك بمداخلة
    جوه شاشة الفضائية
    قبل ما أغرز فيه سناني
    قال مذيع ف وقت تاني
    بعد فترة إعلانية
    *****

    بعد فاصل شفت ساقطة
    ف المهنة إستاذة شاطرة
    عريانة بترقص لي رقصة
    بحلقت فيها بنظره عابرة
    توهت ونسيت القضية
    *****

    ليقت نفسي ف محاضرة
    فيها درس عظيم لواعظ
    بالغضب شحن عواطفي
    خلاَّ روحي لمَّا خدتني
    زي طور مذعور ساقتني
    أرفص واعض ف الوليَّه
    *****

    بعد لحظة سمعت شاعر
    طايره روحه في الفضا
    عزف نغم هز المشاعر
    وفرد بساطه علي المدي
    شاور بإيده قلت اسافر
    للنجوم فوق في السما
    أرسم علي وش القمر
    قلب حبيبتي وصورتي فيه
    وأرسم كمان رايه وعلم
    وأكتب عليه كم شعار
    ده نصيبي وحكم القدر
    دا اللِّي هزمني وذل الأمم
    شعار حزبه فيل وحمار

صفحة 3 من 7 الأولىالأولى 1234567 الأخيرةالأخيرة

المواضيع المتشابهه

  1. صفحات الأديب و الشاعر صبحي حواش رحمه الله تعالى .
    بواسطة نادية بوغرارة في المنتدى مُنتَدَى الوَفَاءِ لَهُمْ
    مشاركات: 19
    آخر مشاركة: 30-05-2011, 07:19 PM
  2. موسوعة اليهود واليهودية والصهيونية للمفكر الكبير الأستاذ المسيري رحمه الله تعالى
    بواسطة د. مصطفى عراقي في المنتدى المَكْتَبَةُ العِلمِيَّةُ
    مشاركات: 4
    آخر مشاركة: 05-03-2010, 07:10 AM
  3. فضل ذكر الله تعالى متجدد إن شاء الله تعالى ..
    بواسطة حسنية تدركيت في المنتدى الحِوَارُ الإِسْلامِي
    مشاركات: 2
    آخر مشاركة: 28-03-2009, 07:11 PM
  4. مقالات للمفكر الكبير فقيدنا الغالي الأستاذ عبد الوهاب المسيري - رحمه الله تعالى -
    بواسطة د. مصطفى عراقي في المنتدى الحِوَارُ المَعْرِفِي
    مشاركات: 11
    آخر مشاركة: 26-11-2008, 11:14 AM
  5. مشاركات: 20
    آخر مشاركة: 16-05-2006, 10:21 PM