قصيدة : فداكي يا مصر

فَدَاكِي يَا مصرْ !
مصر ... كلمة وحروف بتنكتب
فينا إللي يكتبها بقلم رصاص
وفينا إللي يكتبها ... بالحبر
وفينا إللي يكتبها بمية دهب
وفينا إللي يكتبها بروحه ودمه
منقوشة حروفها في قلبة وعقله
وتكويه جراحها بنار من لهب
.................................
وفينا إللى قلبه عليها حجر
وفينا إللي قلبه عليها حديد
وفينا إللي قلبه لسه خشب
وفينا إللي قلبه عليها انفطر
و مليان حنين برغم السنين
رغم الكفاح ورغم التعب
تشوفها في لونه وعرق الجبين
وعمره وحياته عشانها إتوهب
............................
وفينا إللي عشقه في لسانه
وفينا إللى عشقه في مكانه
وفينا إللى عشقه حقيقي
بِيِبْنِي , يِعَلِي , يِزْرَعْ ويِحْصُدْ
يجري معاها وراكب حصانُه
...............................
وفينا إللي عشقه الميدان
يضحي بروحه عشانها
لا همه حياته
ولا همه عمره ولا همه زمانه
وناس تانية عاشقة ترابها
وعاشقة سماها وعاشقة بحورها
وعاشقة الرصيف إللى تقعد عليه
وعاشقة القمر لو عدى عليها
ينور حياتها يفرد قلوعه و تحس بأمانُه
....................................
وفينا وفينا وناس يا ما عدوا عليكى
وإنتي زي مانتي
شايله الكل دايماً في حبة عنيكي
وتقولي ولادي سامحتي إللي عاصي
ودعيتي للي يجري وبايس إيديكي
.............................
و ياما في برك وأرضك ياغالية
شفتي العجب
وفوق رمل سينا حاربتي وكافحتي
وعاديتي وصالحتي لمجد العرب
ومشيتي معانا من حضارة لحضارة
تشهدآثارك وقرآن يحكي عنك
وتاريخ إنكتب
ما بين فرعونية وبين إسلامية
وبين ثورة راحت وبين ثورة جاية
وثورة مضادة وجمعة خلاص
وكام مليونية وجمعة غضب
........................
واقفة تشوفي إللي حَبِكْ صحيح
وتشوفي إللى باعك ومين اِشْتَراكْ
وتشوفي إللي خانك وساءوا الأدب
وتشوفي إللي عاملين مزايدة عليكْ
وقلبك حزين و دمعة عنيكْ
هتفضح تقول مين قلبه قاسي
ومين الأناني إللي هَمُه مَصَالحه
وعِشقْ الكراسي
ومين إللي ضحي ولوحتي غالب
عشانك يا مصر يقول اِنْغَلَبْ
.........................
بربك قوليلي ... يا حمالة الأسية
ما آنش الآوان . نِشِيل عنك شوية
ما تعبتيش يامصر . ما زهقتيش يا مصر
يا غالية عليا
يا نور عنية
يا نبضي وحياتي وعشقي لمماتي
وكل إللي ليا
طب قولي كفاية ... يا ولادي كفاية
تِعِبتْ حرام ... والله حرام
كفاية إللي بيا
............................
أكيد حد فيهم هيسمع نداكي
أكيد حد يجري وهيقول فداكي
أكيد حد زيي بيتقطع عشانك
ويصرخ بقلبه .. معايا ومعاكي
فداكي يا مصر . فداكي يا مصر
فداكي يا مصر . يا مصر فداكي
شعر : د هاني أبوالفتوح
الكويت - الأربعاء أول يونية 2011

د\هانى

لانسكاباتك هنا نكهة خاصه

وسحر آسر يطوق ابجدياتك بقلائد من ريحان

لكَ ولمصر السلامه ياسيدى


كن بخير


نور المصرى

أحب كتاباتك لروحها المميزة ومعانيها الرائعة

ولكني أعجز أحيانا عن تلمس موسيقى النص

وقد عجزت هنا ...

أهو غياب التشكيل الذي يعننا في القراءة .. أم عجزي في اللهجة المصرية المحببة؟

تحيتي لهذه الجميلة المعاني

دمت بخير د. هاني

د\هانى

لانسكاباتك هنا نكهة خاصه

وسحر آسر يطوق ابجدياتك بقلائد من ريحان

لكَ ولمصر السلامه ياسيدى


كن بخير


نور المصرى

هنا أشرق النور بقدوم الفاضلة الأستاذة نور ولك كل المودة والتقدير على كريم الحضور , دمت دوما بألق وود وسعادة

أحب كتاباتك لروحها المميزة ومعانيها الرائعة

ولكني أعجز أحيانا عن تلمس موسيقى النص

وقد عجزت هنا ...

أهو غياب التشكيل الذي يعننا في القراءة .. أم عجزي في اللهجة المصرية المحببة؟

تحيتي لهذه الجميلة المعاني

دمت بخير د. هاني

أستاذتى هنا ماأبرك الساعات وأسعدها وماأكثر سعادتي بمحبتكم وتشجيعكم لحرف متواضع من تلميذ في مدرستكم وأعتذر كل الإعتذار لكم عن عدم التشكيل للحروف العامية للهجة المصرية فهو خطأ ولاشك مني أستميحكم عذرا فيه وأتمنى عليكم بمواضيع النثر الأدبية أن يجد وقتكم الثمين متسعا لقصيدتي أنا النسر أنا مصر وقصيدة بكاء على جدار الوطن فهما بالفصحى عن وطن حبيب لو تتذكرين قصيدتي كلمة لوجه الله منذ شهرين كتبتها وأثبت الأيام أن العيش كثيرا فيما حدث بمصر من ثورة مباركة وكثرة الإغراق والإهتمام بما يجري من محاكمات لفساد ورموزه وترك العمل والإنتاج يقتل حصاد كل ثورة وها نحن ياسيدتي نعاني الأمرين بين هذا وهذا والحمدلله تعالى لذا كانت مجموعة قصائدي التي نشرتها جرائد مصرية وعديد من المواقع ماهي إلا رسالة واضحة المعالم بالنظر للمستقبل وبنائه وأدعو الله تعالى لكم بكل الخير وكل الشكر والمودة والتقدير لشخصكم الكريم وعذرا على تقصيري ولو شئتم وهوشرف لي لأرسلت لشخصكم الكريم القصيدة كاملة مشكلة , طاب يومك وغدك بكل خير وسرور

رائعة هذه المعزوفة فى حب مصر ----شكرا لإمتاعنا بها