قصيدة : ملك الغابة

مَلِكْ الْغَابةْ !!
دنيا وعايشين فيها غَلابَة
بس الدنيا ساعات تِتْحَوِل
شوية شوية تِصْبَحْ غَابة
قلت أتْمَشَّى في وسط الدنيا
وأشوف بِعْنَيَّه الحال الأول
أشوف مين عايش ونَاِفْشْ رِيشُهْ
وأشوف مين عايش بس بْجِيشُه
وأشوف مين عايش مع دَرَاويِشُه
وأشوف مين عايش مَيْتْ حَيْ
وأشوف من عاش في الحب صَبَابة
.........................
واحد حارس عَالبوابة
قَالِيِ إتفضل ولْمِينْ جَايْ
قُلتْ أتمشى وأشوف الدنيا
أشوف إيه حاصل
وليه الناس كُلَّتْهَا تَعَابة
قال إتفضل إدخل جُوة
بس اْسْتَحْمِل م إللي تْشُوفُه
م إللي يقولك عاوز حَقْي
وم إللي ينادي عليك ويْزَعَقْ
وإللي يْقَطَّعْلَكْ في هْدُومَكْ
وإللي يْصَرَخْ وإللي يْحَمْرَقْ
ومَتِزْعَلْشْي
خَللي حسابك عَالْحَسَّابة
......................
سِمِعْتْ الناس بِتْقُول في كلام
إللي بيحكي عن حكاياتهُ
وعن أَساطيرهُ وعن رواياتهُ
وإللي يقول أنا شُفتْ مَنَامْ
وإللي يقول أنا هَمِّي فْطَاري
هَمِّى أْتْغَدَّا وهَمِّي أتْعَشَّى
هَمِّي في نفسي كفاية عليا
أَكْلْ ولادي حِلْمْ الأحلامْ
وإللي حكايته بقتْ مشهورة
جِوة الصورة وف الأفلام
عامل نفسه زعيم الثورة
عاوز الناس تِضْرَبْ لُه سلام
وإللي يقول دا مفيش زَيي
وبحكي وأغني وبَرْقُصْ بلدي
مانا مِتْعَلِمْ أحلى عَلاَمْ
.......................
سِبتْ الدنيا رُحتْ الغابة قُلتْ أتمشى
غابة واسعة وحلوة وبِرِحَة
وتنفع نكتب فيها قصيدة
ونرسم صورة وأحلي سُطور
وأكيد بعد الضلمة ماراحت
شعب الغابة مِسْتَنِّي الْنُورْ
فَتَحْتْ عِنَيْه أشوف الغابة
بَبُصْ بعيد شُفْتْ طُيور
بتجري بسرعة بَرَه الغابة
بتقول خَايفه ياكُلْهَا نْسُور
حتى القُطَة بدال ماتْخَرْبِشْ
تِجري بسرعة تْنُطْ السُور
ألف خسارة في نُص الصورة
شُفت حريقة في وسط زهور
وشُفت الفيل بيقول مواويل
وإنه هَيكْشِّف ف المستور
وأبو قردان بيقول في بَيان
والْتَّعلبْ واقف مغرور
بيقول للكُلْ خلاص م الليلة
مفيش للغابة رئيس يِحْكُمْنا
ومَلِكْ الغابة جِوة ف قَفَصُه
هناك محبوس ومريض محظور
وقرود واقفه هناك تِتْنَطَّطْ
بتقول عينى بقت عَالْحُكْمْ
ولازم مَرَّة يْجِينِيْ الدُور
.......................
قصة غريبة , وقصة عجيبة
معقولة يِحْصَلْ دا في شهور
أكتر حاجة نفسي أسمعها
كانت قصة ملك الغابة
وإللي حصله بعد الْمُلْك
وبعد الحكم وبعد الْفَرحة
إللي معاه وإللي يساعدوه
بعد التاجْ وِلْبْسْ العاجْ
ثَارْ الشعب لِبسوا الْطَرْحَة
.......................
وِمَلِكْ الغابة بَحْ خلاص
ولا لُهْ كِلمَة وصُوت مسموع
و إسمه مَعدشْ مَلكْ الغابة
إللي ينادي يْقُولك سابق
وإللي يقول إِسْمُه الْمُتنحي
واحد تاني يْقولْ مُتَخَلي
وإللى يْقُول إسمه المخلوع
قُمْتْ سألتْ وقلت يا ناس
حَد يقولي إيه الموضوع
قالوا دا شعب الغابه اْتْحَرر
بعد مامات نُصه من الجوع
وعَمل ثورة جُوة الغابة
والثورات دي مافيها رجوع
سِبْتْ الغابة وجْرِيتْ جري
تاني عالدنيا قُلت أنا مالي
حَد يسيب أفراح الدنيا
وكَتْبْ كتاب ولا سْبُوعْ
وييجي يشوف أحوال الغابة
ومَلِكْ الغابة سابق مُتنحي
أو متخلي أو مخلوع
........................
سَمْي يا عم براحتك قُولْ
بعد السطوة وبعد الْمُلْكْ
وبعد العز دا كُله يْزُولْ
شوف دلوقتى بياكل إيه ؟
وعايش إزاي وعايش ليه ؟
حِتِّةْ جبنة وحَبْةْ فول
الله يرحم زمن الكافيار
خد لك عِبرة م إللي حَصَلُه
و ياما في عِبَرْ الغابة أسرار
لو بنى آدم جوة الدنيا
أو في الغابة أسد و حمار
إبني في مُلْكَك زي ماتِبْنِّي
من غير عَدْلْ الْمُلْكْ إنهار
وَحْدُه هو صاحب الْمُلْك
زَي ما يِوْهِبْ زَي مايِنْزَعْ
سُبحانه وَحْدُهْ القَهْارْ !!
شعر د هاني أبوالفتوح
الكويت – الأحد 7 أغسطس 2011

سبحانه وحده القهار
صدقت و اجدت الوصف
يعز من يشاء ويذل من يشاء
سَمْي يا عم براحتك قُولْ
بعد السطوة وبعد الْمُلْكْ
وبعد العز دا كُله يْزُولْ
شوف دلوقتى بياكل إيه ؟
وعايش إزاي وعايش ليه ؟
حِتِّةْ جبنة وحَبْةْ فول
الله يرحم زمن الكافيار
خد لك عِبرة م إللي حَصَلُه
و ياما في عِبَرْ الغابة أسرار

من كان يصدق ان يحدث ذلك يوماً
ولكن ارادة الله حكمت فانقلبت الامور
ثار اصحاب الحق و نادوا الحرية فأجابت النداء
فأشرقت شمسها لتنير دروب الثائرين

قصيدة جميلة
تحيتي و تقديري

إبني في مُلْكَك زي ماتِبْنِّي
من غير عَدْلْ الْمُلْكْ إنهار


في قصائدك مشاعر إنسانية سامية تذكرنا أن الدنيا ما تزال بخير
وفي شعرك لحن يحاكي الكلمات بحزنها وفرحها وثورتها

شكرا للمتعة التي تمنحنا بقصائدك أخي

بوركت

فعلا
سبحان مغير الأحوال
الفكرة
إننا نستعين بربنا بقى
بدل ما " نتيه " فى الغابة
تحياتى لرؤيتك
و
إلى لقاء