يا ريت ممكن تكونيلى
رفيقة سكتى ف ليلى
حياة عمرى وقنديلى
وضلة تحت شجراية
وسهرة ليل فى قمراية
وكلمة حلوة قوليلى
يا ريت ممكن تكونيلى
يمامة عشها هادى
ولمسة حب لولادى
ياريت ننسى الهموم حبة
لإسعادك وإسعادى
يا ريتنا نكون كما المركب
أنا الدفة وانتى شراع
لموج الصبر بنفادى
ولما الريح تطوحنا
بينا نضلل على جراحنا
ويلا نعيش نهار نادى
يا ريت ممكن تكونيلى
منارة فى السما الصافى
ولا تخاصمى ولاتجافى
ونسمة تمسح الدمعة
وبلسم للجروح شافى
هاكونلك وانتى كونيلى
----------