عيد الفطر السنادي
أجمل أعياد بلادي
من غيرجمال وسوزي
نهارنا جميل ونــادي
من غير عِزّ ونظيفْ
والعادلي...والشّرِيفْ
وحسني ابن الأبالسة
وابنه عــلاءالسخيف
من غير سروروعزمي
ورشيد.. والباشا فهمي
وفاروق اللّي بغباوتُهْ
لَخبط عقلي ومفاهمي
من غيربُطرُس وسالمْ
وابو الغيط (المُسالمْ)
وكل اللّي بسببهم...
رقصنا على السلالمْ
هنعيش ونبني دَولةْ
وهنصبح م العتاولةْ
فيها ايه لو يوم خِسرنا
هنعيد تاني المُحاولة
هنصون أرضِك ونيلكْ
وبكل الشوق.. نجيلكْ
إنسي العُمراللّي فاتكْ
يابلادي وشِدّي حيلكْ
العيد بالثورة جالكْ
بيقولك..خَلّي بالكْ
(دم الشهيد أمانة)
وعيالُهْ..مِحتاجالكْ
أمن الدولة الجبانة
قتلوه غدر وخيانة
قطفوا زهرة شبابُهْ
حرموه يفرح معانا
رضــا محمود