قصيدة : بهية

بَهِيَةْ ... !!
يا أهل البلد
مين اللي فيكوا يْدِلِّنِى
لبيت الصَبِيَة
عيونها سُودة زي لِيل
والنِنِّى دُرة في عِنَية
والنظرة منها تْهِزِني وتْرُجِّنِي
واللمسةَ منها حْنَينة
تِرْعِش إِيديه
قالوا عِرفنا هي مين
تُقْصُد بَهية
الله عليها وإسمها
غزال وسارح في البرية
والطعم شَهْدْ تقول عسل
لون الحليب في قلبها
وخدودها قالوا مْهَلَبِية
وللا القوام
فارد قُلوعه بين بحور
والنيل بيجري ف وسطها
لو شُفتها
جنة وزهور
فوق مزهرية
والسِحْر باين من بعيد
تِسْحِر قلوب
بس القلوب حزنانة ليه
إيه القضية ؟
......................
قالوا بهية طول عمرها
متعودة عالحزن والأحزان
شوف السَمَار في وشها
وف قلبها
هتلاقوا مِيِتْ بركان
........................
سألوا بهية ساكنة فين ؟
قالت خلاص
أنا مليش عنوان
شوف ف الشوارع هتلاقينى
وف السما
وبُصْ تحت كمان
جنب الرصيف
ماسكة رغيف
في السيدة .. جايز
في العَتَبَة وف حلوان
خايفة وبهرب من العيون
م السجن و السجان
ولو هتسأل عمري كام
هتلاقي عمري بالألوف
بس الميلاد
مولودة وسط ميدان
....................
سألوا بهية بتاكلي إيه وبتشربي ؟
ردت وقالت .. لو أقول
طَبْ مين يحقق مطلبي ؟
عارفين ياناس أنا طالبة إيه ؟
أنا مش عروسه بيخطبوها
وبيشوفولها في العريس
طالبة الجواز وأمسك إيديه !
طَبْ صَلوا بينا ع النبي
العدل طلبي
والحِلْمْ ديني ومذهبي
وإللي يحب عيون بهية
إن كان عجوز .. وللا صبي
يزرع لها .. ويُحصُد لها .. ويْضُمَّها
ويقول تعالي ف ملعبي
....................
هتشوفي زرع أخضر جميل
وتشوفي مَيَّة ترتوى من وسط نيل
وتشوفي شعب الطِيِبَةْ قَلْبُه مَلُوشْ مثيل
وتشوفي جيل .. طالع بيبني المستحيل
وتشوفي كل اللي تشوفيه
بالعمل .. مش بالكلام
مَلهوش دليل
..........................
ماانتي البَهية وإنتى الصَبِية
وإنتي اللي مكتوبة ف كتاب
من عند رب العالمين
محفوظ بِحفْظُه .. وبآيات
كل إللي يقرا .. يقول آمين
بس خسارة عالزمن لما يِجُور
ألفين خسارة عالسنين
لما بهية يحبسوها في أرضها
وللا إبنها يموت مِنَّها
وللا أبوها يعيش بقيتْ عمره حزين
والطفل يِنْزِل مِنَّها
مرمي بعيد أو جنبها
مين ضمه مين ؟؟
قولولي مين واقف هنا
عنده ضمير ؟؟
ياخد بهية لبيتها تاني
مِطَّمِّنَة تنام عالسرير
ويكون حنين أوي ويكون أمين
ويشِيل بهية جوة صِدْرُة
وجوة قلبه وجوة عقلة
يِحْرُسْها زي الرمش صقر
بيِحْمِي عِين
لو تعرفوه .. روحوا إسألوه
ييجي قوام .. بدل الكلام
طب هو فين ؟ ؟ .. طب هو فين ؟ ؟
شعر د هاني أبوالفتوح
الكويت – الخميس 15 سبتمبر 2011

يانهااااااااااااااااااااا اار ابيض متعطر برائحة الفل والياسمين وكل شىء جميل...
انا من كتر حلاوة الكلمات وعذوبتها ودقتها فى المعانى والاحساس بعيد قرائتها من جديد ...
تسلم ايد يا دكتور ... لوى الشرف انى اول واحد يعلق على تلك العروسة الجميلة.....نقرا الفاتحة بقى ههههه
ابدعت بكل المعانى..

شاعرنا الرائع ...
أبدعت بيانا ومعنى
قرأت هنا واستمعت بجمال الحرف والنغم
الذي يجبرنا على العودة للاستمتاع بالقراءة
جمعة طيبة ...
ودمت متألقا جميلا

قصيدة جميلة الحرف بهية النبض رقيقة المعاني
ونفس شعري جميل ماتع

أحسنت شاعرنا

تحيتي