/
/
/
يا مصر بادعيلك = تِضْوِي قناديلك
بالعدل والنهضة = حرِّية تضويلك
شعبك بَدَعْ ثورة = هتشيلو وتشيلك
والصدق مواله = راح يجري خير نيلك
وَعْيُه مع حبِّك = والقَنْطَرة جِيلِك
يا مصرنا فوقي = مِ الشِّدة لتروقي
مقدرش اتفلفص =طوقك صبح طوقي
فجر الأمل نصرة = دمي لها شوقي
وانت سبب صبري = وفطار صباح ريقي
حاوطيني يا قلبي = للشهد لادُّوقي
يا أُمِّ أمِّتنا = دي الثورة أَحيتنا
و أصولنا ساندانا = دايما ولا مُتْنا
دمِّي لمس علَمِك= إسمك ملا بيتنا
عدينا بيكي كتير = حتى انتخابتنا
راح ننجدك م الغير= يا أُمِّ لمِّتنا
واللهِ دا شعبك = مش كان في يوم تعبك
حالا شوفيه جنبك = صمِّمْ يعيش حبك
ينسى الأنا بيكي = يمشي ف نور دربك
مش أبهر العالم = لما قِبِل صعبك
هايعدي بيكي بحار = ويْفُكلِك كربك
زي احنا ما مشينا = بالثورة هلِّينا
ونزلنا وحامينا = من روحنا أهدينا
يا غالية الغاليين = صناديقنا ف عنينا
راح نرسمك قدوة = خيرك مغطِّينا
أم العرب نصرك = بقلوبنا يحيينا
ياامُّ الهرم والنيل = والمادنة والمواويل
وإذاعة القرآن = والأنس والترتيل
والمغنى والإنشاد = ويَّا ابتهال الليل
واجراس كنايسنا = قرآنَّا والإنجيل
كله بيدعيلك = لله دعاؤه جميل
حالفين لربِّ الكون = راح تبقي أمِّ الكون
وتعلِّمي العالم = تِمْلِي قلوب وعيون
واحنا هنا الحراس = فاتحين ضمير وجفون
عارفينها غايتنا = راح نشطب الِّلي يخون
يا مصر عيشي النصر = والله التراب لَانصون
////
اللهم انصر شعبنا المصري في انتخاباته
واريه الحق حقا وارزقه اتباعه واريه الباطل باطلا وارزقه اجتنابه
اللهم أمين
دمتم احرار مبدعين