بلاش على بكرة نتمرد
لو أتمردنا مش هنعيش
تعالوا مهما نتعرض
لأى ظلم أو تهميش
نصحى أملنا جوانا
وننحت أرضنا الصلبة
نزق بلادنا بدمانا
نعدى المنطقة الصعبة
ما نتهزش من الأعاصير
ونهرب وإحنا أرضنا بور
دى شمس الفجر مهما يصير
أكيد جيالنا بكرة بنور
بلاش نغطس فى قلب الطين
ونرضى بخوفنا ونسلم
ده حتى لو إحنا مضطهدين
لازمنا نفوق ونتكلم
سكوتنا بلاش يكون علة
تخلى اليأس يملكنا
ده إحنا كتير ومش قلة
لو أتحررنا من طوقنا
لإمتى هنبقى سلبيين
ويوم ما نشوف بلدنا تقيد
يا نعمل روحنا مش شايفيين
يا نتفرج وإحنا بعيد
بدأنا الصفحة م الأول
تعالوا نحط فيها حروف
تخلى حياتنا تتحول
وننسى معنى كلمة خوف
بلدنا أمانة فى أيدينا
لو أتصانت هتدى الخير
ولو سبناها ورضينا
هنلقاها فى إيد الغير