جمالك سر م الأسرار

فلاشة حبنا الغالي
عليها صورنا و أماكن
زمان انا و انتي روحناها
و حبة شعر و أغاني
على ذوقي و على ذوقك
في عربيتك سمعناها
و رسمة لبيت هيجمعنا
صغير أه .. لكن تحفة
أنا و انتي .. رسمناها

و قلتي ضحي بالمكتب
عشان نعمل أوضة أطفال
و ناخد جزء م الصالة
يا رب يكونلي منه عيال
و انا اقولك هاربيهم
و اكبرهم برزق حلال

و من شوقنا لأولادنا
و لياليهم
بقينا ننادي بعضينا
بأساميهم

وضاع الحب زي ما ضاع
معاه فرحي و طاقة نور
وانا كالعادة قلت نصيب
و مش عايز أبان مكسور

أخدتي العمر و سنينه
كمان طمعانة ف فلاشتي ؟
يا تيجي بكرة نتقابل
يا أجي و اخدها دلوقتي


زمان كان كل أيامنا
لذيذة و فيها بهجة عيد
و كان فيه حلم بيقرب
و كنت باشوفه قدامنا
لكن دلوقت شايفه بعيد
وحاسس إني متغرب

حبيبتي ليه كرهتيني
و ليه جبتيها في المكتوب ؟
وهل فعلا أنا متطاقش
و انسان صعب كلي عيوب ؟
ضعفتي لدرجة خليتني
أشك بإن فيه غيري
بقيتي بتبعدي عني
معدتيش حتى بتغيري

وبعد ما كنت أوفى حبيب
بقيت خاين و مش مرغوب

أخدتي العمر و سنينه
كمان طمعانة ف فلاشتي ؟
يا تيجي بكرة نتقابل
يا أجي و اخدها دلوقتي

السلام عليكم ورحمة الله

شاعرنا الفاصل

نص جميل ورائع فيه من السلاسة وجمال الكلمة ما جعلنا نعيش معه

تقبل مروري وتحيتي

السلام عليكم ورحمة الله

شاعرنا الفاصل

نص جميل ورائع فيه من السلاسة وجمال الكلمة ما جعلنا نعيش معه

تقبل مروري وتحيتي

سلمت و سلمت حواسك استاذ عايد