قصيدة ( جاني الخبر .. من بور سعيد)
ـ ما حدث في بورسعيد مصر يوم الأربعاء 1/2/2012 أمر يندى له الجبين
تعدي على اللاعبين وقتل وبلطجة
جاني الخبر من بورسعيد بيطير
زود همومي اللي عددها كتير
واشربت قهوه طلبتها بزياده
واتبقى بوء لقيته طعمه مرير
وحلفت ما اشربها بسكر تاني
غير لما احس بطعم للتغيير
*****
قوم خت بعضي اتمشى برَّ ه شويه
والمر لابد ف حلقي بالمسامير
وياريت يا عيني تشوفي منظر يسعدك
غير دم سايل من حناجر .. لم سِكتْ
غير إيد وع الخد اتَّكت .. تعبت بِكِتْ
غير قلب خايف ... ترهبو سواطير
غير رجل ماشيا تِنْعتر .. وسط الحفر
وعقول عليله .. شلها التفكير
غير أم ثكلى وحلمها بين حضنها
تشكي القساوه عند رب خبير
ويا اخويا يا ( احمد ) قوم وصلي ركتين
ويا عم ( مينا ) قوم وولع شمعتين
واللي أرادوا الله .. هو اللي راح يصير
=============
انتهت بحمد الله ، والله من وراء القصد
بقلم الشاعر / محمد محمود شعبان ( حمادة )
مصر ـ الزقازيق ـ محافظة الشرقية ـ