قصيدة : رخيصة يا غالية !
رِخِيصَة يَا غَالْية !!
رخيصة ياروحي وملكيش تمن
هاين عليا .. تبيعك إيديا
وهاين كمان أجيبلك كفن
وهاين أسيبك لوحدك كده
وأخرج منك وأبقي عفن
ماهو إنتي .. إللي خُنْتِي
ضعفتي وتعبتي وغدر الزمن
رخيصة ياروحي وملكيش تمن
...........................
رخيصة ياروحي ومالياك جروحي
مش قادر أسكت وإنتي اللي ساكته
وخايفه ياغالية .. وخوفك لإمتى ؟
وإمتى هتيجي بِسِرِي و تبوحي
ولما أقابلك .. تلاقيني قبلك
تجري عليا .. تبصي ف عنيه
وبعد شوية تغيبي وتروحي
رخيصة يا روحي ومالياك جروحي
...............................
رخيصة يا غالية .. مليش غير رضاك
وبسأل يا غالية ......
مين إللي باعك ومين إشتراك ؟
ومين إللي عايش و عاشق هواك ؟
ومين إللي مستني ينهش في لحمك ؟
ومين إللي يجري وجاب لك دواك ؟
ومين إللى واقف ع الخط ضدك ؟
ومين إللي جنبك وواقف معاك ؟
ومين الشيطان ؟ ومين الملاك ؟
رخيصة ياغالية مليش غير رضاك
.........................
رخيصة يا روحي ...
لكن لا يمكن تهوني عليا
مادام نور عنيه
أطالع في روحي
وتعيش بس روحي
ما هي اللي ليا
وتشوفني ساعتها
بفديها بروحي
ما هي الحياة ونبض الحياة
الباقي ف عروقي
وهي الغناوي
وهي العَلَمْ وهي التحية
بس إنتى ياروحي ساعتها الضحية
لاشايف حبايب ولا شايف قرايب
و شايف يادوب طابور بلطجية
وياما كتير مروا عليكي ومروا عليا
وياما النفاق من غير إتفاق
يبين ياغالية .. حقايق خفية
ناس بنقابلهم
من سود سنينهم
دموع نازلة منهم ومين هيآمنهم
الغدر في عيونهم
والخيبة القوية
............................
رخيصة عند اللي حبوا يرخصوكي
ووقت الشدة جريوا وباعوكي
ووقت الخير عاوزين يحكموكي
ويقفوا يغنوا بلادي بلادي
عشان الأغاني كلام قوله عادي
مكتوب فوق لسانهم عشان يلهفوكي
ولو جَارْ مَرَّة عادي جريوا وسابوكي
............................
رخيصة ف عيونهم وغالية ف عنية
وشايلك في قلبي وحاضناك إيديه
وطول عمري ليكي وإنتى اللي ليا
كفاية ما بينا فيه عيش وملح
وياما فرحنا بلقمة هنية
وياما قسمنا فلوس الماهية
كفاية علينا نعيش جنب بعض
وعشنا بعرقنا مانعرف فُراقنا
بتجمعنا كلمة وبيتنا مِيدانا
نِكَبَّرْ لبعض ونسمع أدانا
ووقت الهموم
نشيل هم بعض
ومن غير سكات
بنبكي ساعات
ونضحك ساعات
ونحكي حكايات
ونفضل نقول
رخيصة ياغالية
رخيصة يا غالية
شعر د هاني أبوالفتوح
رد مع اقتباس
المشاركة الأصلية كتبت بواسطة الطنطاوي الحسيني
