الساعة واحدة .
والخلق نايمة .
ويا الملايكة . تحلم ببكرة .
ومراتى تصرخ .
بموت ياخويا .
باينى هولد . هيبقوا عشرة .
والواد يعيط .
جعان ياعبده .
ولاتغير . أما سهرة .
وحماتى تزعق .
سخن لى مية .
والحاجة سعدة . تجى لى طايرة .
مين كان يصدق .
فى عشر سنين .
يحصل داكله . دى عايزة نشرة
ياما قلت لها .
فى بداية حياتنا .
ارتاحى شوية . هو انتى قادرة
لكن حماتى .
الله يسامحها .
تزن فى ودانها . فى السكة ضرة .
ترجع مراتى .
بعد ماوافقت .
لأ لأ ياخويا . أنا برضة حرة .
وجت حميدة .
وأحمد وليلى .
وعلى وسميرة . وهلم جرة .
لو حد يسخن .
الكل يمرض .
لانجيب حكيم . ولاحتى قطرة .
دكتور منين .
هى الماهية .
يدوب تكفى . ناكلها مرة .
حتى المدارس .
مانعرف طريقها .
وولادنا يبقوا . للخلق عبرة .
وكل مرة .
نقول كفاية .
نرجع وننسى . وتبقى حسرة .
أنا كنت بحلم .
بسهير وأحمد .
وإن مرة غلطة . تجى لنا زهرة .
ومراتى كانت .
معايا ناوية .
زى ماقلنا . وتقول لى فكرة .
نقدر نربى .
وولادنا تلبس .
تاكل وتكبر . فيه حد يكره .
وأحسن مدارس .
نعلم ولادنا .
ونكبر معاهم . ويزيدوا شهرة .
لكن حياتنا .
تجرى بسرعة .
ومرة ومرة . والعجلة دايرة .
وبقينا دستة .
لاقدرنا نلبس .
ولاحتى ناكل . فاصوليا خضرا .
قدام عنيى .
الدنيا تجرى .
واقف مكانى . مربوط فى شجرة .
وأخويا ماهر .
مطلعش ماهر .
حاله يبكى . وبقينا بصرة .
ولو مش مصدق .
جرب وسافر .
مرة بولاق . أو حتى غمرة .
دى ناس بتمشى .
ولاالقيامة .
الثورة قامت . هناك فى شبرا .
ناكل منين .
نشرب بكام .
فين المدارس . فين الأسرة .
وكل يوم .
نبنى فى كبارى .
حتى المدافن . محتاجة عمرة .
حتى الزراعة .
زحفت عليها .
مبانى عالية . بطوبة حمراء.
زحمة شوارع .
ناس بتشقى .
والعيشة صعبة . والخلق صابرة .
لو كنا ننوى .
نغير حياتنا .
لازم نعيش .على أرض طاهرة .
هناك فى توشكى .
ولا فى سينا .
الدنيا واسعة . ورمالها صفرا .
عايزة العزيمة .
وناس بتفهم .
تزرع هناك . ميت ألف شجرة
قوام هتكبر .
وتعلا وتعلا .
وتطرح بسرعة . تمرة وخضرة .
هواها نضيف .
لافيها تلوث .
ولاحتى زحمة . بلاد بكر حرة .
مصانع هنبنى .
مزارع هتنتج .
مساكن وصحة . مدارس بوفرة .
آخر كلامى .
الأمر كله .
فى إيدينا احنا . دى حقيقة ظاهرة .
كلمات : عصـــام ميــــره