كلمتين قبل السفر
لازم انتى تسمعيهم
كنت مشتاق انى اقولهم
كلمتين حاسه بيهم
ولا اقولهم
كانت البدايه بينا كلمه
كلمه بيضه ف كلمتين
كلمة الحب العنيده
سرحت فيها من سنين
وعشت ياما م السعاده
عشت جنه ونور زياده
كنت فوق كل البشر
فوق خدودك
غنوتين
كنت كلمة حب شارده
سارحه طارحه بين ورودك
رايحيين
كنت رايه
او علامه
كنت ليكى الابتسامه
كنت لص
او انانى
كنت ليكى شخص تانى
يجمع الفرحه بأهاته
وبشوقوا ليكى يهديهالك
يطلع البرج العلالى
من بروجك
ينتحر على ضى عودك
كنت كلمه نفسى اقولها
حاسه بيها ولا اقولها
وكلمه تانيه جيت اقولها
قبل ما ارحل
دى النهايه
كلمه تحرق ف الحشايا
م البدايه
كلمه اسيه
ف كلمتين
كلمه تقتل السنين
تطرح الشوك ف الحنايا
وتصب ملحك ف السجين
مش منايا
انى اغدر
ولا ارحل
ولا اقتل بسمه زايفه
بين رموشك
بس انتى اختارتى منى
النهايه
من عمايلك جيت بقلك
دى النهايه
كلمه مش محتاجه منى
تكون حكايه
اصلى حبك كانلى خوف
كنت خايف يوم تضيعى
كنتى شمسى سنين ربيعى
كنت بحلم بيكى دايماً
ورده شامخه وسط غابه
كنت خايف
أه عليكى م الديابه
كنت شايفك نجمه تايهه
وضى لامع
فى سما
اعلنة حرب التوابع
كنت خايف أه عليكى
كنت ف سكوتى بقلك
خلى بالك
يعلى صوتى بنبره خايفه
أنصحك
وافرد جناحى احضن كفوفك
وافرحك
كنت ليكى كل حاجه
كنت كلمة حب جامعه كل معنى
مستحيل كنت اعبر بالكلام
عن شعورى
وكل معنى
والبلاغه مش هتقدر ع الهيام
هى كلمة حب منى والسلام
قولتهالك من زمان