مد أيديكي
وشيلي برقة طبعك
كل الضلمه اللي ساكنها سوكاتي
أنا منستش الوجع المدفون
لكني بحاول أهمس كلمة حق
بيحاول قلبي يدق
ويزف الفرحه لقلبك
بصراخ الدهشه المخلوط بالعشق
وبقولتي إني بحبك
وباموت في ترابك
مش باضعف
بالعكس بتزيد قوة روحي
وبتشرق داخل نفسي الشمس
فتدفي القلب البردان
وتسقي نفسي العطشانه
روعة تقاطيعك
فيسبح عقلي سبحان العاطي المنان
مد أيديكي وما تخافي
أنا قلبي مركب عشق
ف عصر الطوفان
بيشق نهار مجنون
وأيديه حاضنه نهر الحب
العطشان لشفايفك
ما أنتي الحضن اللي هيفضل
والدفا مزروع في عروقي
والريحه الحلوه المليانه بعطر ترابك
أضحكي يامه خلاص
كل الغربان إدارات
بعد ماقصوا ريش أسيادهم
ورموهم جوه الزنازين
أضحكي يا مه وما تخافي بعد اليوم
حتي العسكر ليهم يوم وهيمشوا
أما بخاطرهم أو بالميدان
صوتنا خلاص بقي يوصل
وبتسمعه دنيتنا مش زي زمان
ومفيش حيطه بعد اليوم تقدر تخفي صورتنا
ولا أيد تقدر تخمد فرحتنا
مخلاص يامه
أتعلمنا الدرس خلاص
وعرفنا أن سكتنا سر خيبتنا
وأتعلمنا حدود الصبر
مبقاش ينفع نصبر وخلاص
ولا نسكت ونطنش علي شيء بطال
هنجيب حقك يامه
هنقطع كل عقود مضوك عليها الخونه زمان
وهنمنع غازك عن صهيون
عن كل القتلة وكل جبان
ونولع في اللي هيديهم خيرك
ويصهين وكأنه مش واخد باله
م الفقرا في أرضك
وكأن رغيف العيش مرصوص أكوام
ومصانعك شغاله بكل أمان
والخير طامم وبناتك وولادك لقيوا شققهم
وفي لمحة عين صبحوم عرسان
مش عارف يامه هما اللي موفقين بخاطرهم
والا ضعفت قوتنا
وإتهدت أسطورة جيشنا خلاص
خايف ليكون الزمن الجاي أسود
ويكون الحلم اللي حلمناه وياك كابوس
ويرجع من تاني زمن الهكسوس
بوشوش تانيه
ويعود الطير الجارح ينهشنا
مش عايز يسخر بيا شباب الكون
ويقولوا بشماته شفتوا الموكوس أبو ثورة
راضي خلاص يركع راضي بحكم الهكسوس