كان يا ما كان
ف توته و بيت..
و ضلايا
و قصه حاسسها جوايا
بلاد واسعة على الأخر
ونهر طويل ما له نهايه
بلاد دينجا..
أميرها كان ديموقراطي
حاكم شعبه..
و شعبه عشان..
ما هوش لاقي
في جيبه ما فيش..
يا دوب هدمه..
و لقمه تكفي..
ما تكفيش
وكان راضي
بناتها حلمها ف طرحه
بنات..
الدبله ف ايديها..
بقالها سنين..
علي يمنها
بنات..
الدمعة في عنيها
سنين الوحده
تقتلها
بنات..
تبص ف يمنها.. و ف شمالها
ما فيش حاجه
و ناس بتموت و محتاجه..
و نهر..
بيجري ع الفاضي
و خيرها كتير..
و مش لينا
لأبن البيه..
و لــــلــباشــــــــا
و انا و انت ف كماشه
في كفر ف حي و ف حاره
غلابه كتير و منداسه
و لسه قلوبنا ..
حساسه !!
أمير دينجا..
طلب منا..
نقول أحلامنا قدامه
كتير قاموا..
كتير قالوا..
و معرفشي لفين راحوا
اخويا و قام
يقول حلمه
خادوه على فين ؟!!
مانيش عارف
ومش حلمه
دا حلم كتير
دا حلم الجيل
ماهوش بايع
لكن ضايع
عشان
كوسه
و مش حلمه
ف لمسة ايد
وتسبيله وكام بوسه
لكن ماسروق
ومين سارق
لكن منهوب
ومين ناهب
وقالوا
بلدنا محروسه
وجي دورى اقول حلمى
اقول حلمى ؟؟!!
ودينجا بحلها محبوسه
حلمنا كتير..
لكن كوابيس بتتحقق
كتمنا الحلم جوانا
رسمنا البسمه ع الخدين
نشوفها ف بعض فنصدق
اقول حلمى ؟!
انا خايف
ولازم اقول
فقلت
أنا حلمى أشوف ضلمه
وناس حلوه
وناس ظلمه
وفيجا كتيره
و فياجرا
شبابنا
معادش فيه قدره
و رقاصه
و واد طايش
ف قالوا ..عبيط .
ف قولت.. عبيط و بيرياله
لكن عايش
دا ناس حلمت
يكون ليها
و طلعة هي مدانه
و ناس حلمة
بحبة عدل
ف صبحت
جوه زنزانه
وناس حلمت ..
بدبله
وطرحه
زغروته
فاصبحت جوه دوامه
كتير شوفنا
كتير تهنا
و تاه الحلم جوانا
أمير دينجا
فتح دينجا بشكل عجيب
عشان دينجا..
تكون دينجا..
لكل غريب
و خد من قوتنا ..
و اداهم
ف وقت ما جوعنا.. هناهم
وقت ما موتنا .. علاهم
انا و انت..
نجوع نعطش و نتعرى
و خير دينجا يروح بره
متين مره
باموت ف اليوم
و نفسي ف يوم
أعيش مره
و اشوف القبض بيكفي
و بات ف بلادي
متدفي
و اقول الحق..
الاقي الحق
..من صفي
عملنا كتير وبادينا
و طلع الحل مش كفي
و شوفت كتير
شجر مانجا
ما هوش طارح
وشوفت
حنان كتير جارح
وغصن زاتون..
طارح خنجر
و قصر كبير ف جبّانه
و غول طايح
وعدنا كتير يجيب لينا
لقينا
الجي مش لينا
اتاري
الجاي كان رايح
وقول لك أيه
مانيش عايز
عشان دنجا
بتدى الجيزه
للجايز
وتدى الفيزه
للفايز
وتلقى
الحق ..للظالم
وتلقى
السجن للمظلوم
وتلقى
المنحه ..للمانح
وتلقى المحنه
للممنوح
بنغرق
واحنا مش حسيين
منين تيجى
سفينة نوح
ويطلع فينا
كام شاعر
فايكتب نوح
ويكتب
صوره معكوسه
فانلقى
خيرنا ف الكوسه
عشان
الصدق مش مسموح
بقول لك أيه
بلاد دينجا
ماهيش بلدى!!!!!!!!!!
بلاد دينجا
ماهيش بلدى!!!!!!!!!!
وبحمد ان انا ف بلدى
وخير بلدى
عشان للفرد ..
كام شقه
و بزر اسود ف بطيخه
بلاد دينجا..
ما فيش بطيخ و تعبانه !
مؤلف دينجا.. كنت انا
عبيط وأهبل وبرياله
عابيط وأهبل
وبرياله
أكرم حسن أحمد