ومضات

تعرف مِنّي..

أحسن حد ما ييجي يقول لك..

الموضوع ان انا مش ممكن

لحظة أمَلّك..

ويكون في المعلوم لو فاهم

أنا إحساسي اللي هيفْضل لك..

هتشوفه ف أحلامك.. ضِلّك..

وان تُهت ف أشتات الدنيا

قلبي يدّلّك..

ورضاك اللي هيحضن فكري..

هيأكدلي الروعة اللي بتتمدّ

وتملا كيانك/كُلّك

يعني افهمني يا ريت أحسن لك

تعرف منّي

أحسن حد ما ييجي يقول لك

لو ألْف واحد

قالوا ع الموز يوستفندي

هيفضل اللي قصادي موز

لو 5 مليون أكدوا :

المغرب ادّن قبل واحدة الضهر

وسط القاهرة

هصرخ: أساسًا لا يجُوز

لو جاني 100 مليون

وقالوا الجيش بيحكم عندنا "بالقسط"

أو قايم بثورة لشعبنا

فكأنهم بيقولوا 100 مليون

هيقدروا يستحموا ف قلب كُوز !

يا طيور السيسي

ياللي مراقبينّي

طُزّ ف جواسيسي

دايمًا كارهينّي

حياة "القَصْر" أغبى حياة

ومهما تشدُّه أو تحلَوّ

هشوف ثوار بلدْنا وراه

يخلّوا نهايتُه أصلاً سَوّ

يا طيور السيسي

ياللي مراقبينّي!

#على_هامش_التحرش

أنا المحسوبة ع الدنيا

في أذهانكم كيان معدوم

في لحظة محنتي أصرخ

فتقتلني الشوارع لُوم

ويجرحني اغتصاب الهم لجفوني بْـ

قلق معلوم

ومش مسموح كمان أشرح

آلامي ولو بصوت مكتوم

كأني أجيرة في العالم

وأمثالكم صحاب الملك

وواجب لما اكون ماشية

أكون شايكة مْحاوطني السلك

**

ومش مسموحلي أتساوى

بخطوتكم وادوس على بر

ولو فكّرت يوم أخرج

ياريت شَبَح المرو في السر

أقول مش برده إنسانة؟

يقولوا يا بنتي بعد الشر!

ومن نخوتكو

فاكرين ان وحدي بصَمْتكم

بَنْضَرّ

وأشْجعكم بتتلخص شجاعته

وقت ما بيْفِر

وبيحلل حرام النظرة

واللمسة فْ زحام الحَر

ومن لذة عمى الأبصار

تزيد طعنات في خيط بيكُر

عشان مكتوب على عنيكو

تكون آخر حروف الجر

أنا مش هحلف.. لكن أُقسِم

إن السيسي بيعرف يرسم

رسَم الدور على ناس تعبانة

قال لهم ان الشعب اتقسّم

وان لحامه ف إيده لوحده

وانه بنَفسه هيقدر يحسم

ماحسمش الا قرار ترشيحه

بخطاب طالع فيه يتبَسِّم

والفاهم من سَنَتين فاهم

والطور في البرسيم بيبَرْسِم

بطلوا ده واسمعوا ده

ياما لسة نشوف وياما

المشير يا وقعة سودا

فوضوه باسْم الزعامة

وانبطح شعب المهاودة

قال له في إيديك القوامة

بكرة هيشوفوا المفاجأة

كهربا وبنزين /رخامة

اللي سارقاهم خيبتهم

مش هتنفعهم ملامة

واللي صدّعنا بمؤامرة

بكرة هيبوس إيد أوباما !

أذاكر؟ أذاكر واسيبك لمين

يادوب لسة داخل برجْلي اليمين

ومالحقْتش اقعد غير اربع سنين

أسيبك لمين
**
ومين راح يدبلر يا وحش الوحوش

بَصوّر ملازم وابيعها لْجيوش

وحتى المدرج ما قرّبتلوش

وكل اللي من دُفعتي ما اعرفوش

#مذكرات_طالب_مدبلر

فكأنهم بيقولوا 100 مليون

هيقدروا يستحموا ف قلب كُوز !

هذه بصراحة معلقة وحدها رغم قصرها
وياطيور السيسي رائعة والله
ماشاء الله لي فترة لم ادخل لارى الجمال
جعل الله كل حرف تنافح به عن الحق في ميزان حسناتك يا بطل يا مبدع
صح لسانك
ولا فض فوك
امطرهم و الحق معك
دمت مبدعا رائعا اخي محمود موسى

فكأنهم بيقولوا 100 مليون

هيقدروا يستحموا ف قلب كُوز !

هذه بصراحة معلقة وحدها رغم قصرها
وياطيور السيسي رائعة والله
ماشاء الله لي فترة لم ادخل لارى الجمال
جعل الله كل حرف تنافح به عن الحق في ميزان حسناتك يا بطل يا مبدع
صح لسانك
ولا فض فوك
امطرهم و الحق معك
دمت مبدعا رائعا اخي محمود موسى

بوركت يا شاعرنا
ومنورني دايما :)

الثورة أسوأ شيء في الكون

جه فجأة جه طلّع عينّا

كان الوطن بالخير مسكون

كات مصر بتساوي ڨيينّا

من غير لا ڨيرس أو سرطان

أو حلم تايه في عيونّا

ومرور تمام وجنيه مصري

بيناطح النجمة قبالنا

حتى الشوارع والأقسام

كات يابني حتة من الجنة

لا شُرطة تبدع في التعذيب

أو حتى ريّس بيخونّا

كان بيراعينا لدرجة إيه

نعمل خطابه يا ناس رنة!